RUNDUS – ǁNâuguxoaǁguib hîas Ministeris ǂUrusib tsî ǀHûhâsi !Oabadi dis ǀkha ūhâb !nâ-ūs ge International University of Managementsa (IUM), Rundus ǂHanusi ǀAeǁgâuba ǀae!khōs !aroma a ǂhâbasa xūna ǂoa ge wekheb di Wunstaxtsēs ai ge ǀkhae. Nē khaeb hîa N$8.5 miljuns ǁkhāsiba ūhâb ge sao rana !khōǂgā hâ, sonars masindi, ǁaeb ai!â ra !nae ǀgôaron ra ūhâ!nâhe kharorogu, tsî kaise ǀaesen hâ khoen ǂōrisa !ûi!gâs tsî ǀae!khōde ǂhâbahân !âb !nâ sîsenūs masindi tsîna.

Nē xūna ǀkhaeb ase mās di ǂâibasens ge Kavango ǀkharib tsî ǂnamipegu !nâ ǂurusib !oabade ǀgaiǀgaisa. Nē ǀkhaebab gere ǁkhaeǁnâ soab aib ge IUMs ôa!nâdi mâisab, Profesor Peter Nyarangoba ǁkhawa ge ǁawoǁ­awo, nē universitaits di ǁguiǂgāsens ge ministeris ǂurusib disa ǂkhâ!nâsa, nē ǂhâbasa ǀae!khōs !aroma huisenxūna ǁamabas !nâ-ū. “Nē ǁnâuguxoaǁguib IUMs tsî ǂurusib ministeris hâra ge xoa!gaob !naka kha ge hoa ǀkhākha ge mîǁgui, !ereamxasigu tsî ǁgui-aide nî ǀgoraguse isa,” tib ge Nyarangoba ge mî. ǁÎb ge mîs ge Rundus ǂHanusi ǀAeǁ­gâub ge ǁîb ǂgurose nē ǁnâuguxoaǁ­guiba xu nî domdorese a ǁhûihesa, nē ǀaeǁgâub ǁnaeǁgauǀîhe nî senters ase a ǂâi!nâ­ǁguisa tsî ǁnā-amaga ǂurusib ǂgaoǀkhādi ai nî dīǀoaǀoa tsî ǀgaisa aiǁgausa nî ǁgauǂui amaga. Nyarangob ra mîsa !oab ge ǁnâuguxoaǁguiba, IUMsa ǁnāti ī aiǂhanuba ra mā, koro ǀaedī-aon, ǀō-aisa !harigu !nâ a ǁkhāǁkhāǂuisana nî ǁgauǂuise hîa ǂHanub ǂurusib !khaigu ǁga nî sîǂuihese. Nē ǀaedī-aon ge ǁgau!nâs tsî ǁkhāǁkhāǂuis ǀae!khōs !nâ ra ǁkhāǁkhāsen studentn dis ai ǀgui !ammâisen tide, xawe ǂhâǂhâsa ǂurusib !oabadi tsîna nî mā.

ǀKhaebab gere !khō!oa soab aib ge Kavangob Aiǂoas ǀkharisi Mûǂamaob, Hamunyera Hambyukaba gangansa IUMsa ǁnā ǀkharib khoen di ǀons !nâ gere mā. Hambyukab ǀaro tsî ge mîs ge, Rundus ǂHanusi ǀAeǁgâuba nē ǂkhâ!nâsa !khō!oas, ǁkhorexase ge !khō!oahe !khaisa, ǁîs Kavangob Aiǂoas ǀkharib ǀguiba !oaba tama hâ, xawe ǀae-aon hîa Kavangob Huriǂoas, Zambezib tsî ǁanǁare!hūb, Angolab ǀae-aon tsîn hoan !aroma hâsa. –Nampa