Solomon “Jeesu” Hawala hapo ombangaṋe nu wa pwire onḓengu youmbangaṋe nu ma sokukasuvisiwa pEtjo rOzombangaṋe? 

Otji tjiri meyo nai tji tja kende Operesindenda yEhi Netumbo Nandi-Ndeitwah nOswapo kombunda yonḓiro ya Hawala ngwa ṱire Omandaha komanene wehi eye nai kekara omayuva omasenina ke kondja noukurundu noveta kombunda yokutwa otjiyoke pehi otjOtjiuru tjOrupa rOndjururiro rwehi. 

Tjeri otjihavero tja kambura kOroitenanda Ongenerara Dimo Haamambo mo 2000. Na twa otjiyoke pehi mo 2006 tji pa yarukira Oroitenanda Ongenerara Martin Shali. 

We rikuta kOswapo mo 1962 nu mo 1964 a piti mehi eye kakamuna omaupikiro momatjururiro nondjeverero mOkongoa mOtanganyika, Onorth Korea mo 1968 nOmahi yOruwano rwOsoviet mo 1981. 

Tja mama komurungu yongutukiro ya Namibia arire okoroitenanda ongenerara nomunane wokehi wotjivangwa tjOswapo tjovarwe nu mongutukiro arire omunane wokehi worupa rwa Namibia rondjururiro kehi ya Haamambo. 

Motjirwa tjongutukiro ngunda pemwe aari omurwire wayo tjingetjo wina wa hara eṋi rokuzepa ovarwe ovakwao vongutukiro nganda a hara ena eyamburure indi: 

“Otjizepe tja Lubango” tjinga omunwe au urike muye kutja ongwari kongotwe yozondjito ozohazendu zomaumino wouṋepo oukwao wotjira, omatauriro wawo movitoto ovengi mu va zengira. Tjinene imba mba zirire komamuho wehi mondivitivi ngandu komanene nene waro okukavaza kEhi rOzongwena. Mu mu nozosano zoo Nguaiko, Kaseraera, Kazaronda, Kamburona, Tjizera, Kush. Mu nao ovengi mba kara mondjuriro ya “Jeesu” nomihoko vyao mbya zenga kehi yovitjitwa vye ovihazendu imbi otji ve nomuihamwatima wokutja eye ngwi wa zupo nokuhina ohongonono wa seko kutja ovengi mba ihamisa nokutwa mozondjuriro pekepeke wa ningirire kondjesiro poo nandarire okuyandja ohongonono nandarire yokutja imba mba zenga va zenga vi nomahuno wawo ye ri pi? 

“Ouhumandu, Solomon ‘Jesus’ Dumeni Hawala kaari nu ngamba monḓiro ye , keri mokati ka imba mbu mave varwa otjomurwire wongutukiro. 

Ove na ami, Muzapamwe Netumbo kutja imbwi omburi ouatjiri mbu ha paterwa pendje.” Edward Ndopu nai ngu turira mOkanada nu nguri umwe ngwari movitoto vya Lubango wa tjanga nao kOperesindenda Nandi-Ndeitwah motungovi. 

“Arikana omuinyo wa ka Saatana wotjiryavandu otjihatamunwa tji ngau nyosiwe kongaaruhe,” Ndopu wa tjanga nao. 

“Omairo wa Hawala nokuhino’hongonono nokutwa otjikamo konyungu komauvi wovita koundu, omaihamisiro kotutu, omatwiro momapando wotjingi, omazengisiro kotjomasa nokutuwa mohaikota nga tjitwa nokuhina okuvinḓa kovengi mbari kehi yondjeverero yOswapo moutaure pokati ko 1974 no 1989, ya yeka ovandu va Namibia notjiwaṋa tjouye mouparanga watjo umwe wovatunduuze vakatjoruhonga nohatoi,” Phil ya Nangolo ma tja.