ONGWEDIVA- Ngaashi naana kwa teelelika oshiwana shi ka hoolole Etitatu, omupopiliko wokakomisi haka ungaunga nomahoololo moNaimbia (ECN) De Wet Siluka okwa kumaida oshiwana opo shi ha umbate oilwifo ile okudjala imidjalo dashangwa omadina eengudu dopapolitika pefimbo tashi ka hoolola.

Okwa ti osha fimana opo oshiwana shi li ufe komilandu odo da tulwa po koECN.

“Oshiwana na shi kale shi li melandulafano momikweyo. Omunhu keshe okwa manguluka okulopotela ombelewa yetu ile opolifi ngeenge okwa mono oulingilingi tau longifwa koukefa vokuhoololela,” ta ti.

Omafiku 26 Novomba, oku na omahoololo oukaansela koikandjohoololo ya yooloka osho yo omahoololo ovaleli vomeedoolopa.

Ovanhu ve na eedula okutameka 18 okwa teelelwa opo va longife oufemba wavo okukahoolola ovaleli ovo va hala.

Eengudu dopapolitika da yooloka oda ka kufa ombinga momahoololo oukaansela osho yo keedoolopa. Siluka okwa ti ovanambelewa tava ka longela koukefa vokuhoololela ove li longekida oku ya kula nawa oshiwana pefimbo lomahoololo.

“Opolifi nayo oko tai kakala okukaleka po elandulafano neameno,” ta ti.

Okwa yelifa ta ti omunhu keshe oku na oufemba wokuhoolola ongudu ei a hala ndele ka pena omunhu ta ningilwa omatilifo kutya na ka hoolole ongudu yonhumba.

“Efiku lomahoololo ka pena omunhu a pitikwa a longife oulingilingi nombabo okufuta oshimaliwa ovanhu kohandimwe nelalakano va ka hoolole ongudu yavo,” ta ti.

Okwa ti ovanhu i na va pumbwa okuumbata omalodu ngeenge tava i koukefa vokuhoololela ile va kolwa shaashi otashi eta va ye kondje yomilandu da tulwa po.

“Eengudu dopapolitika i na di pitikwa okukala da ngudumana poukefa womahoololo tava di xwaxwameke oshiwana shi ka hoolole ongudu yavo,” ta ti.

Siluka okwa weda po ta ti ka pena omunhu a pitikwa okukala e li kokakefa kokuhoololela ta lombwele ovanhu kutya ye okwa hoolola ongudu i li pipo. “Omunhu ngeenge okwa mane okuhoolola i na pumbwa okuyandja okukalata kaye oko e li shangifa komahoololo, komunhu umwepo opo a ka hoololife na ko luvali,” ta ti. – fhamalwa@nepc.com.na