OSHAKATI – Oradio yOmulunga opamwe noFaith Foundation Trust oye li metifa okulongekidha omaudhano goongonyo taga kala pokati kaadhani ya yooloka mboka taya ka kwatelwa komeho kaadhaningonyo dhingi Harry Simon osho wo Paulus Ninja Shimweefeleni. 

Sha ikwatelela koradio yOmulunga uudhano wowina woongonyo pokati kaHarry Simon naNinja, otau ka dhanwa momasiku 14 gaJuni nuumvo mokapale kemanguluko mOshakati. 

“Esikundyoka otaku kakala omaudhano goongonyo gahamano ga yooloka. 

Moka mwa kwatelwa Makondo naRumblem, Tate Buti naStyn, Dj Da Silva naEwaa Tuu, nayakwawo yamwe,” ya popi ngaaka. 

Omulunga Radio ogwa totha mo wo kutya otaku ka kala wo aahikingalo taya ka mwenyeka ngaashi Tate Buti, Ras Sheehama osho wo yalwe. 

Taya ti, okuya mo meni lyokapale okatekete kowala oke na N$100.00 kumboka taya landa kuyele, omanga pomweelo pe na N$150.00. 

“Okatekete ko-VIP oke na N$1 500.00 momuntu omanga moshitaafula shaantu 10 shi na N$ 15 000.Uutekete otawu monika moshilongo ashihe ngashigeyi, koWebtickets nenge poositola adhihe dhoPick n Pay,’’ ya ti ngaaka. 

Uudhano mboka otawu etelwa koThe Faith Foundation Trust pamwe nOmulunga Radio. 

Uudhano mboka owa landula uudhano woongonyo pokati kaBulelo Nghipondoka naPaulus Ndjambi a shiwika nawa “Get Rich” mboka wa li wa hulile molweetho olutitatu, kape na ngoka a sindana. 

Uudhano mboka owa li wa hili oshigwana moondoolopa dhokonooli. 

Okwa li wa dhanwa mehulioshiwike ya zi ko kokapale kemanguluko kOshakati, wa li wa longekidhwa ongoshinyangadhalwa shokumwenyeka momauliko gomazimo niipindi. 

-vkaapanda@nepc.com.na