ONDANGWA – Omupilimaminista Elijah Ngurare okwa kumaida oshiwana opo shi kale shi na oukumwe wokuyambidida ovanangeshefa vashona molwaashi otashi yambula po eengeshefa davo.
“Ngeenge eengeshefa dishona itadi yambididwa nena itadi dulu okuxuma komesho,”ta ti.
Ngurare okwa li ta popi kouvalelo wowina wa longekidwa kelelo lodoolopa yaNdangwa wa li ko mexuliloshivike.
Ouvelelo owa ningwa nelalakano lokuongela oshimaliwa shokulongifa momaulikilo oipindi oo taa ka kala ko neudo momafiku 27 Juni fiyo 7 Juli kOndangwa.
kOuvalelo okwa ongelwa oshimaliwa N$740 600.
Mopaife ngaha oshi li oshikando oshi- 12 elelo lodoolopa yaNdangwa tali ningi omaulikilo oipindi.
Ovaleli vopapolitika, ovanangeshefa novaleli vopamifyuululwakalo okwa li va holoka momwaalu muhapu okuyambidida elelo laNdangwa.
Ongeshefa yoRani Group oya yandja oshimaliwa N$100 000, FNB N$80 000, Oshipangelo shaNdangwa shopaumwene omaN$30 000, MTC N$20 000 nosho tuu.
Omupresidente mukulu Nangolo Mbumba okwa yandja N$10 000 omanga Omupilimaminista Ngurare okwa yandja N$50 000.
Ngurare okwa ti omauliko oipindi okwa fimana molwaashi otaa yambula po eedoolopa nokueta oyuuyemo yoshimaliwa.
“Odoolopa yaNdangwa oya xuma komesho paife. Osha fimana opo omaulikilo oipindi a twikile okuningwa,” ta ti.
Okwa yelifa ta ti omalelo eedoolopa otaa dana onghandangala ya kula okuyandjaneka omayakulo koshiwana ngaashi omeva, omadu, okulonga eepate nosho yo omalusheno komalukanda nokutunga oundjuwo.
Okwa ti ombelewa yaye otai twikile okuxwaxwameka eeministeli da yooloka opo di yambidide oshiwana okutota po eengeshefa davo ngaashi oikunino younamapya.
“Eengeshefa oda fimana molwaashi otadi yambula po eliko loshilongo. Eengeshefa otadi lwifa ondjala noluhepo nokuetela ovanyasha eemhito doilonga,” ta ti.
Okwa weda po ta ti osha fimana opo ovanyasha va kufe ombinga momaulikilo oipindi.
“Ovanyasha nava longife ounongo wavo okutota po oinyangadalwa oyo tai dulu oku va etela oyuuyemo,” ta ti.
Ngurare okwa kumaida oshiwana opo shi holoke momwaalu muhapu oku ya komaulikilo oipindi aNdangwa nelalakano lokuyambidida ovanangeshefa.
-fhamalwa@nepc.com.na