KATIMA MULILO- Nihaike kuli muunda nobonahalile mwa silalanda sa Kabbe ya Mutulo, kubonahala kuba ni kutulo yende, nekubulezi muyemeli wa sillanda Bernard Sisamu. Naize nihaike mezi amuunda na nanuhile kwa libaka zecwale ka Namiyundu ni Malindi, kanako yacwale sasweli kukutela fafasi.

“Hakutaha kwa kutulo, bane baitahanezi kulima, mwalikweli za Muyana kutisa Muimunene ñohola, babile ni kutulo yende. Kono bane bacezi kakulyeha mwa Ñulule kutisa Sope, nebasika fumana hande pula. Pula nesiile kunela kacwalo mbonyi nesika hula hande,” nabulezi.

Naize balimi bane bacezi peu ya mabele ni mauza sebasweli kukutula, mi kuitekezwi kuli kukaba ni kutulo yende. Muyemeli naize muunda nosika fita famayemo abilaeza. “Hausabisi, mi mezi sasweli kukutela fafasi. Sihulu luli, hakuna likolo zene kwalilwe bakeñisa mezi amuunda. Batu basakona kuya kwa lipatelanyana, likolo, nikufumana lisebelezo za mubuso,” nabulezi.

Sisamu nabulezi hape hala mafulelo alimunanu. “Pula neli yeñata mi netisize mafulelo amande. Batu neba tutisize likomu zabona kulitisa kokulumbile, kono kikale balikutisa, mayemo kiamande,” nabulezi.  Naekelize hape kuli “muunda nosika tisa litapi zeñata, kono hape nosika tisa sinyehelo. Kimayemo alikanelezi,” nekubulezi Sisamu.