Nandarire kutja kuza onḓiro kai tindirwa kape nomuano warwe nokutindira nomaundjiro wokutja motjiwaṋa tjOmbanderu mu na varwe ovazandu novakazona mbu mave yaruka motuveze twaimba mba i. 

Otjiuru tjOvahona Erastus Tjiundikua Kahuure me rihuhumiṋa na wina omuhoko notjiwaṋa tje kotuhongwe omayuva inga tu matu tonwa mOmbara Otjitambi Aletha Karikondua Nguvauva, naye omuini na wina imbwi omuhoko auhe wOmbanderu. Owo nai mbwa yekerwa tjimue ozongunḓe nomawoko wawo omanene nomamuho yetatu. Pu pa tengere Omuhonge Omunene wOmbongo ya Afrika, Zacharia Ngetujame Makari notjivike tjingetjo kuye aku kongogorere vevari Paul Unanuavi Kahorere na Barnabans Ndorondoro Kandjavera. Ngunda Makari aa suvisirue mOkahumandu ka Mongua Osondaha nda zuko, Kahorere ma suvisiwa muhuka mOroroamsa kOmongua ngunda Kandjavera ama suvisiwa Osondoha indi kOdehoeka kOtjombinḓe. Mehungi ku na Keetute wOmurari Wondjivisiro Ombaranga Oritjatatu Omuhona Kahuure otja tjivisire ozombakero azeembari inḓa ama tja onḓero yomuhoko okupera omawoko wawo inga ondjozikiro ndje vepwire otjiovandu mba kondjera omuhoko auhe momuano mbwe u kondjera kanaa ya yenenisirwe kehi yombako yotjikutu na wina, kehi yozombango zovayaruke oveni. Kahorere aa senine ae rivangere kutja ma kasuvisiue pu na ihe kOroroamsa ngunda Kandjavera aa vanga okuyenda ku ina kOndehoeka. Otja ku Kahuure yari onḓero yomuhoko wOvambanderu kOkaoko kutja Kahorere ma kayate kOmbara ye omuyaruke Keharanjo II  Nguvauva kOngango posi ya ape ha yenenisiwa. Nngunda oserekaze ya Kandjavera novanatje ave ha vangere okupenga onḓero yomuhona wawo. 

“Omurumendu ngwi ongwa uta ombutiro indji yotjiwaṋa itji tjaaku zu otjomutjemo tjOvambanderu. Okukondjisa okuzikamisa otjihavero tja Keharanjo. Otjomuatje ngwa kwatwa kehi yomaraa nomazeva wombazu,” Kahuure ma tja ohunga na Kahorere. Ngu ma tja a hongorere po otjiwaṋa okumutjivisa mouye pekepeke. Na tja kamundu ngwa putukire uriri nungwari u kara aa vera. 

“Omuatje ngwi Barnabasa ingwi wina wa kara noviṱo ovinene movikaṋena vyotjiwaṋa tjOvambanderu. Okuzeuparisa ongaro yomananeno wOtjiwaṋa tjOvambanderu. Pondondo yotjivahero tjOvambanderu.” 

Kahuure ma pata ama tja ngunda otjiwaṋa atja wisa ovanatje ovazandu vevari imba atji tira nga tji kayende komurungu okuzeuparisa ozonguraneno zawo otja kozonḓero zombazu zotjiwaṋa. “Ae, onḓiro oini ku za kai tindirwa. Onḓiro tji ye ya i handuza kangamwa omundu auhe. Posi ya u zemburuka nawa kutja ko nokuyepa oruveze ndu wa pewa,” Kahuure me rivanḓiparisa notjiwaṋa tje.