“Kamaa zembwa”, “Kamaa manuka” ovo yawo mondjuwo yetando mOtjomuise va tjere nao nu ngeri omambo ngu va vasisire korukuiko kOmurari wOndjivisiro Ombaranga tjaa sekama okuyenda. Omundu ndo tjo tja keha re, Epukiro.

Nandarire kokutja okoṋa ozondekurona ku za undurirwe tji maze zu motumbo twohangauti yohuurire yOvandoitji na indjo yOzomburu ndja rumatere eṱa rohaungauti indji ngandu kehi yondyero ya Ondendala ai rambere ovandu kozoresevate. Posi ya ngunda ape ri nao, eye o me kurira na wombere muro tjimuna ozongombe zawo. Tji ve mu yarurire Oritjatatu kEpukiro ave ngara mave kemuyatisa uriri pOmimbonde Vitano. Nungwari eye omuini a wombere otjopoṋa pa wombera ozombura nozombura tjimuna inḓo ozongombe zawo inḓa omborisa nokuwomborora wina poṋa nopoṋa nokuza poruveze rumwe ngandu kurwarwe. 

Kutja ena re indi Katjirua ri urisiwe, omundu ndu mo yenene okutoroka kokutja kamundu ngwa ha tjirwa poṋa uriri nu ngwari ngwaa wombere. Tjimuna tja wombera pu nOmunene Ombara yOvambanderu okuza kourengewona we ngandu konḓiro yomuyaruke Ombara Munenee mo-2008.  Nomunene tja za po pomuhoko wina a ha zapo ngandu kundino ndi monḓiro ye omuini. Kakutja nambano eye ngo ma kotoka ma kapite kEkunde ra Tjambi. 

Ku ma kawomberera pu na imba kombanda ehi mba wombererere pu na wo mena nonḓero yomuhoko wOvambanderu. Kakutja nao ngunda kamundu ngwa zupo momuhoko nungwari eye ma katekera omuhona we omeva mOkahandja. Kutja wina otja tjee mu ungurisa movitjitwa vyomuhoko ma kayende komurungu okumutarerera kutja omuhoko uri mongee ngaro nokuhupa pu novakuru novaṱi otjiwa notjiyangapara.