OSHAKATI – Oshibofa shaHilia Shikongeni ou kwa li a kwatwa po omudo wa dja ko shaashi a yandjaneka omafano omukainhu mukwao e li hamunghele osha undulilwa komafiku 30 Juni 2025.

Shikongeni okwa holoka momhangu yaShakati omwedi wa dja ko omo a pangulilwa oshibofa shokuyandjaneka omafano omukainhu mukwao e li hamunghele.

Omukulunhu koshikondo shokukonakona oimbuluma moshitukulwa shaShana Omupedukomufala, Frederick Ndjadila okwa koleka ta ti konima yomafiku 30 Juni 2025 epeko loshibofa otali ka tuminwa kombelewa yomupangulidjai Martha Imalwa.

Pefimbo Shikongeni a kwatwa okwa li e li meteelelo ashike paife okwa mona okaana.

Opolifi oya hokolola tai ti Shikongeni okwa ya mongodi yomushamane waye ndele ta kufa mo omafano omukainhu mukwao e li hamunghele.

Okudja opo vati Shikongeni okwa andjaneka omafano oo ndele taa monika kovanhu okupitila komapandja okomalungula.

Okwa li a pewa obooloxa yokulifutila mo modolongo noshimaliwa omaN$2 000 pefimbo kwa li a holoka momhangu lwoshikando shotete.

Omakonakono opolifi otaa twikile kombinga yoshikumungu eshi.

Opolifi oya kumaida oshiwana opo shi xulife po okuyandjaneka omafano ovanhu ve li amunghele molwashi osha puka notashi dulu okueta omunhu a kwatwe po.