NKURENKURU- Kavango zoutekero kavalipakerere kumwe mwaza sirongo mokulira nakufa Presidente gontoterwa Dr. Sam Nujoma ogu gadogorokere mo 8 Muronga mosipangero somoVenduka. Nguuru gomukunda Sirkka Ausiku katente asi age kuna kudiworoka asi nakufa ogu gumwe gatulire eparu lyendi asi sirongo esi simanguruke ntani muhoko gwahepa kutunda nokusiruganesa venyaso.
‘’ Nzodi zendi zoumpitisili ntani kuligava kwendi kwatulisapo ntateko zaNamibia, mokutwara ukumwe komeho ntani ezo komeho mekuliko. Moomu tupu tuna kulira ezumbanesa lyomuntu gwetu ogu, ose nsene kuna kudana morwa age kapisi mpitisili tupu gakere, ntani age kwatulire eparu lyendi mokukondjera Namibia. Ose nose twahepa nye kulituramo tuze komeho moomu galituliremo nakufa, mokuruganena kumwe yipo ytukulike muhoko gwetu,yimo ngoso ana kuhuyunga. Mukurona pamberewa zondango gendeso mukunda Kavango zoutokero Mathews Singambwe katente asi Nujoma ngavamudiworoka morwa kweyi garugana ngompitisili mokumangurura sirongo esi, nositamba asi kwatulisapo etateko ntani gumwe gapura moukumwe.
‘’ Ose ngatudiworoka Nujoma asi Presidente gwetu gokuhova ogu gakere nokabinete zonunu wokusika tupu ko 19, vaministera apa nye twatamekere noudemokoli wetu. Mosiruwo nye sokukara asi age Presidente, yipo vadikire sure ngwendi zaHimarwa Ithete momukunda horowero gwaMpungu,’’ Singambwe yimo ngoso ana kutanta.
Singambwe simpe katente asi kuna kudiworoka asi mugara ogu gaya twikire kuvhukisa sivaro sovakalimo mombongarero zanavenye ndi vaministera wokutunda koKavango.
‘’ Siruwo sooso sendi yipo vaturongere kudimba rusumo rosirongo nomunovhura kusikama nsene kuna kurudimba. Guhyetu ogu gatota sirongo esi paemanguruko kwakara noyirugana nopira kuvhura kuvarura asi yinke garugana unene komukunda gwetu. Hawe yousili age ngatumudiworoka narunye narunye,’’ yimo ana kutanta ngoso. Mugwanekedesi gwaSWAPO momukunda Kavango zoutokero, Elina Diparo katente asi Nujoma katumudiworoka narunye narunye asi muntu ogu garugana Yuma yomutaro, muntu ogu gagendesa Namibia nomukaro gomuwa, udivi ntani gahana utjirwe posiruwo sendi.
‘’ Ngomuhoko, ose kuna kupandura kweyigarugana mokukondjera sirongo esi simanguruke. Gareta emanguruko, moumpitisili wendi, ngosirongo yinzi twagwana.
Ose kapi ngatumudivara kweyi garugana, omu gahepera sirongo esi posiruwo sokukondja asi sikamangurke, omu nye gareta mpora, mwenyo gwendi gukapwizumuke nompora, presidente gwetu gokuhova. Yimo ngoso ana kutanta.