Rudolf Gaiseb

Ministeris ǂNamipeba !ûi!gâs, Hain tsî !Narisarimas dis (MEFT) ge ra mîmâi, ǀhûhâsigu ǀkha sîsenǁaresa, îs nēs !nâ-ū !norasasib ǀgauga ǀkhamaǀkhama, !aub!ûi!gâsa ǂgaoǂgao!nâ tsî aimâi, tsî ǀhûhâsiga ǁkhāǁkhākhâi tsî hoa­ae !nāsa ǂansa mās ǀkha ǁāǁā. ǁNāpas ge ministerisa ǀhûhâsiga ge ǁkhōǁkhōsasib ase ība i ǂkhoaba Onawa !garo!ās, Omusati ǀkharib !nâ ǂnôas tawa a ǂnoa!nans, khao!gâs ge ministerisa ǁîs di !hausensa gowaǂui tsî ge mî, ǁnāpa i ge ǀkhara ǀgau-e ǀkhai i !khaisa ǁkhaubas ase, nē ǂkhoab ge ǀhûhâsiga !aob !nâ mâi tsî xūna  mâsiba a !aromas khao!gâ.

Ministeris ǂNamipeba !ûi!gâs, Hain tsî !Narisarimas dis di ministers, Indileni Daniels ge ǂoa ge wekheb di Denstaxtsēs ai Parlements ǁanina ge mîba, ū!oasa ǂûsi tanisenǀgaugu hîa !gôasib, !ereamxasib tsî !gâi mâsib nî hâsa kō!gâs tsîn hoaǁae ǀhûǁarebese ra ǀgoragu!nâhe hâǁareb tsî hâmab !aroma !hū!âdi !nâ nî !khōǀgarahe !khaisa. ǁKhā soab ais ministersa noxopa gere mîs ge, ǁguiridi hîa ǁkhāǁkhākhâis !nâ-ū mâsib !nâ !haese tsî xawe oresa nî hōse ǂâi tsî dīs ǀgaugu, ǀhûhâsiga ǂhâbasa ǂansa hō tsî sîsenū ǁkhās ǂnamipe ǁgau!nâs tsî ǁkhāti ǂōǂōsib ǁ­aegu !nâts mâti nî ǂoaxa-ūsens tsîn ge kaise a ǂhâǂhâsa, khoen tsî ûitsamaxūn tsîn hoana ǁkhaubas !aroma.