KATIMA MULILO – Mabala amuunda ni mishitu yetibani mwa sikiliti sa Zambezi, kibupaki bwa sifumu sa silalanda mwanaha Namibia. Kono kwa sicaba se sipila teñi sifumu seo sikona kuba simbule sa sabo ni bumai. Mwalikweli zapili liketalizoho za silimo sa 2025, likomano mwahala batu ni lifolofolo litisize mafu ababane ni likolofalo zabaketalizoho.

Likubu, linali ni likwena kona zetisa hahulu butata. Kezahalo yacwanuñu ne ezahalile la 4 Kandao teñi muuna walilimo zemashumi aketalizoho kazesilezi Oliver Chunga Simasiku nafumanwi ashwile mwa silalo sa Lusu. Sibuabui wasipokola mwa sikiliti sa Zambezi Kisco Sitali nanitifalize kezahalo yeo. 

“Simasiku ubihiwa kuli na nanuhile kwa lapa lahae mwa munzi wa Kakoma kakusasa la 2 Kandao kuya kwamasimu, ashimbile tobolo yahae kuba silelezo. Kasamulaho akusakutela kwahae, lubasi lwahae bakala kumubata, mi bayo fumana situpu sa hae mwa mushitu,” nekubulezi Sitali. Mapokola bane baile teñi nebailo fumana situpu sa Simasiku ni likolofalo famba ni mautu alobehile.

Mutala wakubu nofumanwi mabapa, ili kusupeza kuli muuna nataselizwe ki folofolo yebuhali. Tobolo yahae nefumanwi fone kufumanwi situpu sa hae. “Situpu nesi isizwe kwa sipatela sa Katima Mulilo kuyo pazulwa. Bahabo neba lemusizwe,” Sitali naekelize. Yeo kipiho hala kuhula kwa likomano za batu ni lifolofolo. Leeverty Muyoba, muzamaisi mwa likolo la silalanda, mishitu ni bupoti mwa sikiliti sa Zambezi naize likolo lisweli kusebeza katata kubukeleza sicaba ni kusileleza limbule.

Kanako yacwale taba ye bilaeza kiya sikwata sa litau mwa lilalo za Ngonga, Lizauli ni Sachona mwa silalanda sa Judea Lyaboloma. Likolo la silalanda lisweli kulisa litau zeo, fokuna ni za sisali zepeli ni bana bazona. Kubata kualabela kwa taba yeo lukanda lwa kulondota nelu beilwe kwa tau yeñwi ya sisali kuli bakone kuziba koliya.

“Lu utwisisa sabo ni lipilaelo za sicaba. Sikwata sa luna siboni kuli milaka yeshekesha yasilelezwa ni matente atiile.  Kalulo yeo ibukeleza likomu kuli lisike icambaela nikuli litau lisike za libona, ili kutibela kuli lisike za tasezwa,” nekubulezi Muyoba. Mulelo kikututisa litau zeo kuli isa kwa Bwabwata. Sicaba si elezwa kusa saba nikubona kuli habasuti bukaufi ni litau kuli basike bali shomaeta.