EENHANA – Egandjo lyomapapa koNUST kEehnana moshitopolwa shaHangwena mEtine, olya ulike kutya oopelesanda ashike ooshona dhaalumentu oyo ya mona oonzapo momayilongo ga yooloka omanga oopelesenda odhindji dhaalongwantu mboka, aakiintu.

NUST okwa zaleke aalongwa ye li 141 omaguwo moondondo dha yooloka Etine lya zi ko, sha ningilwa mosenda yopakathimbo kEmbaxu moshitopolwa shaHangwena.

Shika oshikando oshitiyali oshiputudhilo shoka sha tumbulwa pombanda sha zaleke aalongwa ya sho omaguwo.

Omupresidente omukulu Hifikepunye Pohamba esiku ndyoka okwa li a pandula aakiintu oyendji sho ya tula elongo miilonga.

“Sho nda tala mokati keni moka aalumentu otaya yalulwa, omanga aakiintu oye yendji,omolwa shike? Thikameni mu tameka okulesha omambo ngaashi aakiintu taya ningi,” ta kumagidha ngaaka.

Pohamba okwa popi kutya elongo oshinima sha simana moku humitha komeho oshilongo shika, ihe kashi shi ashike okumona onzapo.

Ta popi kutya, esiku ndyoka ka kwali e na okuthika koshiindingili shoka, ihe omwenyo gwe ogwa ka e nda ashike opo athike.

Ta nyenyeta kutya, okuuvithwa nayi kosikola ndyoka inaayi  tamekwa okutungwa natango.

“Ndjika osikola yoshiputudhilo shopombanda, yilile po okulundulula oonkalamwenyo dhoyendji, ihe sigo onena inayi pwa okutungwa ngaashi shali sha uvanekwa,” kuume koshiputundhilo shoka Pohamba ta nyenyeta ngaaka.

Ta ti, okuza omumvo gwayi elolo lyondoolopa yEenhana olya gandja nale ehala mpoka ta pa tungwa, ihe sigo onena opwa tulwa ashike ondhalate.

Pohamba okwa indile osikola ndyoka yi kale ya tamekwa okutungwa meendelelo.

Omupeviminista gwelongo Dino Balloti esiku ndyoka okwa yamukula kutya epangelo olya longekindha oomiliona N$50 dha nuninwa okutunga iiputundhilo yopombanda mwa kwatelwa shoka shokEenhana.

“Onda ndhenge ongondhi mbala konima yenyenyeto lyaKuume koNUST Pohamba, kutya oshimaliwa shoNUST yokEenhana nashi kale sha tumwa mbala,” ta popi ngaaka.

Ta kwashilipaleke kutya oshiputundhilo shoka otashi ka tameke okutungwa.

vkaapanda@nepc.com.na