Sipokola sa naha Namibia siekelize kutukufalelwa kuzuma lifosi zengunganywa kwa mafu asituhu abasizana babalalu – Ingrid Maasdorp (5), Roswinds Fabianu (6) ni Beyonce !Kharuxas (15). Kubulaiwa kwabona, kone kumakalize naha kaufela, kutisize bunyemi ni kekezo yaponahalo ya mapokola ni lipatisiso mwanaha kaufela. Mubakweli Yomuhulu wasipokola mwa naha Elias Mutota nabulelezi New Era kuli mapokola baitamile kufumana tatululo.

“Mapokola basweli kusebeza katata kueza lipatisiso zeka tisa kuli babakulubelwa batamiwe. Nihakulicwalo, lutokwa tuso ya sicaba ni swalisano kuli lufumane litaba zeka konisa kuli babakulubelwa batamiwe,” nabulezi. Kutisa cwale balishumi ka alimuñwi ili batu babali mwa meeto amapokola neba buzizwe, mali ne angilwe kubona mi linepo zeñwi lisupeza kuli haba ngunganywi kwa mafu ao.

“Hala mali abalishumi ka alimuñwi ane angilwe kwa batu bane babuziwa lipuzo, abasupile akutile mi hangungahanywi kwa lipulao, mi ababane halusika fumana kale linepo zateni. Hakuna batu babañwi babali mwa meeto amapokola bane ba buzizwe lipuzo,” naekelize. Mutota naciñekile kuli nihaike mupuzo wa N$50 000 usepisizwe kwa limembala za sicaba, babakona kutisa bupaki sakata bobukona kutisa kutamiwa kwa babakulubelwa, mapokola basweli kunahana kuekeza mupuzo wo. Nihakulicwalo, masheleñi aku ekeza fahalimu hasika lumelelanwa kale.

Ingrid nabitelezwi nikubulaiwa la 20 Liatamanyi. Viki kuzwa falifu lahae, situpu sa Roswinds nesifumanwi kwamulaho wamatotaeti kwa Veddersdal kasamulaho abihiwa kuli watondahala. Situpu sa !Kharuxas nesifumanwi mazazi asikai kuzwa fo, kuekeza kwa kuhula kwa sabo ya sicaba. Maasdorp ni Fabianu neli baituti fasikolo sa KW von Marees, mi litupu zabona neli fumanwi mabapa ni lukwakwa lwa sikolo.

Sibuabui wa sipokola mubakweli muzamaisi Kauna Shikwambi naize, !Kharuxas ubihiwa kuli naile nibalikani bahae kwa linwelo la bucwala, baana bababeli haba babulelela kuli bakona kuba lekela bucwala. Nafumanwi ashwile kukulubelwa kuli nabitelezwi, mwa komponi ya Five Rand lizazi leli tatami, kushangula bunyemi bobutuna ni sabo ya sicaba.

Mueteli wanaha Netumbo Nandi-Ndaitwah kweli yefelile napotezi mabasi asilisa kwa komponi ya Nau-Aib. Nasindeketilwe kibaetapili babañwi mwamubuso, kungelela cwalo ni ngambela wanaha Elijah Ngurare ni babakweli makwambuyu ba mulao, kulikanelela kwabaana ni basali, tuto ni makete. “Kutaha kwaluna kikuto mi ombaomba, kono nto ya butokwa, Mwambakani ki Yena yaziba sesika latelela,” Nandi-Ndaitwah nabulelezi mabasi asilisa.