Ongwediva – Omwaalu wovanhu va koya po 23 245 ove li tava lumbu nombuto yo-HIV/AIDS moshitukulwa shaShana, nove li kepango olo tali kaleke po oukolele wavo efiku nefiku.
Edi oda popiwa komukulunhu wouhaku moshitukulwa Johanna Haimene, pefimbo va li tava tyapula efiku lo-HIV/AIDS pamwe novanhu ava tava lumbu nombuto ei, osho yo ava hava di novanhu ve na ombuto ei Etitano komukunda Okamwandi.
Haimene okwa ti efiku nefiku, onduba yomayovi ovanhu ohave ke li konaakonifa, nokutala apa va fikama ngeenge tashi ya kombuto yo-HIV/AIDS.
“ Monena ovanhu ava tava lumbu nombuto ei, ovo vamwe ve na oukolele kuhe na vali,” ta ti. Okwa ti keshe omwedi ohava tambula omiti davo, nepangelo ohali fi oshisho kutya omiti opo di li poipangelo yakula, osho yo poukilinika.
“ Omunhu ngeenge oha nu omiti daye pefimbo nomondjila efiku nefiku, ombuto ei i li molutu laye ihai dulu okutandavela iye komunhu mukwao shaashi kai na vali eenghono. Hangaashi i li komunhu ou iha nu omiti,” ta ti.
Okwa twikila kutya ngeenge ovanhu ava ve na ombuto ei ova twikile nokunwa omiti davo mondjila, vo ava ve lilimbililwa tavatwikile nokukala tave likonaakonifa, otashi shunifa pedu eepelesenda dombuto moshitukulwa.
Onda hala okutwa ovanhu ve li kepango omukumo va twikile nokunwa omiti davo nawa nombili.
“ Ovafilishisho osho yo ovakwapata ava mwa idilila ovanhu tava lumbu nombuto ei, twikileni nokukala navo nombili, osho yo oku va fila oshisho,” ta tu omukumo.
Haimene okwa holola yo olupandu laye kouministeli wouhaku eshi hau lipake mo mokukwafa ovanhu ava tava lumbu nombuto ei, nokwa twa ovapangi neendokotola omukumo diha loloke.