“Kandi shi omuhikingalo, ihe ngame omwiimbi,” Matias Jason ta ti ngaaka, ye ta fatulula nkene onkalamwenyo ye ya yonagulwa kwaamboka haya ningi ookopi oongalo dhaahikingalo.

“Okukala omuhikangalo ohashi pula oshindji, ohatu longitha iimaliwa yetu okuya koostudio nokweeta po omambo goongalo ngoka nelalakano lyokulanditha tse tu mone oshimaliwa shoka twa longitha osho wo oshimaliwa shomboloto yetu”, Jason ta ti ngaaka.

Ta ti aakwashigwana oya thimininike oonkalamwenyo dhawo kongudhi noku dhi lyatela pevi, ta ti otaya kondjo ya hala okuza moluhepo ihe otaya undululilwa mo natango.

Ta gwedha po ta ti, oongalo dhawo otadhi ningwa ookopi nokutulwa muu-USB yo taya tula momamandjukundjuku gawo, taya ningi iimaliwa noongalo dhawo omanga yo mba ya eta po oongalo ndhoka taya tala pombanda.

“Mboka owo uukoloni hawu popiwa, oonkondo odhandje ihe ngame itandi mono mo sha. Otu na ashike omapakete momagumbo ga udha uu-CD oshoka kape na ngu te wu landa. 

Oye na nale ookopi muu-USB”, Jason ta yelitha.

Moonkundathana naKundana Jason okwa ti ye ita mana po we ethimbo lye nokweepeka iimaliwa a ka hike oongalo koostudio nokweeta po oka-CD. 

Ye ngashingeyi omwiimbi ashike, ano ye okwa inekela moshiketala moka ha mono okashona hoka ha mono shi vulithe okulanditha uu-CD ye ta kana.

Ta kumagidha ta ti ooyene yoondingosho inaya longitha we ookopi. 

Oshoka otaya shunitha oongeshefa dhaahikingalo monima. 

Omanga yo taya ningi iimaliwa tayi zi moonkondo dhaahikingalo mboka ihaya mono ko sha kookopi ndhoka.

Omwiimbi gwomayimbililo okwa ti okwa kanitha N$48 000 sho a li a ningi oalbuma ye yahugunina ndjoka ya li ye mu shololitha opo a kulukile moshiketala.

Ta ti, oshiketala she ihashi mu uvitha nayi, oshoka ngele a kuutumba pehala, ihe ta tameke oku shi dhenga shoka noku ulika uunkulungu wewi lye nena oyendji ohaya kunguluka ko kopate e taye ya ya pule eyimbilo ya hala okudhengelwa ye ta dhengwa okati koonyala.

-vkaapanda@nepc.com.na