WINDHOEK – Katengo kasikiliti sa Zambezi katokwa bolule balishumi bwa masheleňi (N$10 million) kuli kukoniwe kututisa bayahi baminzi kuli kusiyale ndao yakuzwisezapili milelo yetasinganyekwa ki limembala ze ketalizoho za katengo ka Bukalo Village Council kao kaswanela kukongisezwa.
Kualabela kwa lipuzo zanabuziwa ki ba mutende wa New Era, yo muhulu mwa Ofisi ya sikiliti, Regina Ndopu-Lubinda, u tatuluzi kuli ofisi ya sikiliti sa Zambezi itokwa mashelenyi a maňata kulifa bo lyaminzi ba Bukalo kuamana ni mibu yabona yeo ilelezwi kubeya libaka za bomapangapanga, lipisinisi mane ni mayahelo amaino.
“Libaka zeliteni kwateni kacwale kizenyinyani. Luamuhezi likupo zeňata za libaka za bomapangapanga, lipisinisi ni zamaino, kono akuna libaka zeselukisizwe. Kufitela nako yelutalifa batu kona lutatateka kulukisa libaka.” a talusa. Na ize, mwa musulo wa silimo se, bafumani feela bolule babane ba masheleňi (N$4 million) alitifo feela, seo natalusize kuli kiamanyinyani.” Bukalo nebile ni liketisa la milonganyana leneliezahalile hande-nde, kamo kopano ya SWAPO neiwinile lipula ze ne, kusina hakanyeho mwahali alipula ze ketalizoho za tolopo ya mwahae (Village Council). Bo lyaminzi bana ni tato ya kushenya fobanzi, taba feela ki yakutokwa pene. A lukoni kukena mwa sibaka samutu ni kutateka lisebelezo,” kwa bulela Ndopu Lubinda. Na patuluzi taba yakuli Bukalo italimani ni butata bwa kutokwa mezi, nto yetakutiseza zwelopili ngombemongo.
Na tolokile kuli butata bo butiswa kimezi alizwai afumaneha mwa sibaka seo.”Bakeňi samezi alizwai, kufumaneha kuli mipila ya mezi ya tibana. Mipila ya mezi ipalelwa kunga buima bobucwalo,” a talusa.
Nihakulicwalo, Ndopu Lubinda u ize mupila wa Katima-Ngoma uka mezi mwa nuka ya Liambai ni kufa mezi kwa bayahi babukalo.
“Nihaike kuli lizwelopili likalile, lusaswanela kuekeza kwa mezi, maboni ni sibaka ko limbuzi likasheza teni zemaswe. Luna nimikwakwa ni mandu a mashumi asilela ka mashumi amabeli ka mandu a silezi (86) a sweli kuyahiwa kiba National Housing Enterprises (NHE),” a talusa.
Zwelapili kutalusa kuli, sibaka sakuyumbela matakala nisona sesifelile kwa Bukalo. Libaka lakuli buňata bwa bayahi ba Bukalo balekiseza mileko yabona famisika yesikainelela, Ndopu Lubinda u ize kuna ni milelo ya kuyaha musika okwaluhile.