Ehangano lyokutala onkalo yombepo moshilongo olya tengeneke kwa tegelelwa omuloka omunene omasiku ngaka miitopolwa yokonooli, kuumbugantu osho wo kuumbangalantu woshilongo.

Okwa tothwa mo iitopolwa ngaashi Otjozondjupa, Omaheke, Khomas, Hardap na //Kharas, omanga yimwe ya mono omata ohela.

Oonkulungu dhokutala onkalo yombepo odha shanga kutya omvula ndjoka otayi ka kala onene yi na omandundumo osho wo oombadhi.

“Iitopolwa yimwe oya mono omuloka okuza Etitatu, ihe natango okwa tegelelwa yimwe yi mone omvula onene,” ya shanga ngaaka.

Okupitila komalungula, okwa lopotwa wo omagumbo gamwe ga halakanithwa kombepo kiitopolwa yimwe yokonooli.

Natango okwa lopotwa oshikungulu sha halakanitha omagumbo koLeonardville sho wo koGobabis moshitopolwa shOmaheke osho wo koTsumeb moshitopolwa shaShikoto, kOtavi moshitopolwa Otjozondjupa osho wo Stampriet koshitopolwa shaHardap.

Aakalimo ye li 200, okwa lopotwa ya thigwa puuhayela sho omagumbo gawo ga teywa po kombepo yoshikungulu omutenya gwEtiyali koAranos moshitopolwa shaHardap.

Sha ikolelela kuuyelele wa pitithwa kuuministeli womauyelele moshitopolwa Hardap ombepo yoshikungulu ndjoka oya teya po omagumbo ga adha 70, sho ya gwitha ko iipeleki nokuhalakanitha omalusheno osho wo omatungo.

Ombelewa yOmuprima oshiwike sha zi ko oya li wo ya pititha omushangwa kutya oshigwana nashi kale sha ilongekidhila oshikungulu, omolwomvula onene ya tengenekwa tayi ka kala ko nuumvo.

Oya ti wo, ope na ompito onene yokukanitha oomwenyo dhaantu, iimuna neteyagulepo lyomatungo, onkene oshigwana nashi kale sha ilongekidha.

-vkaapanda@nepc.com.na