KATIMA MULILO – Sikiliti sa Zambezi sibiha lipiho zelikana 34 kakweli zabungoki mwahala baana ni basali. Muokameli wamutayi obona zabubangoki mwahala baana ni basali mwa sipokola sa sikiliti sa Zambezi, Rahele Tawana, napatuluzi Labutanu kanako yakupatalaza mungendenge wakulwanisa bubangoki mwahala baana ni basali mwa sikiliti sa Zambezi.
Tawana naize 90% ya liezwa ki basali mi 10% ki baana. Kono naize nombolo yeo ikaswana yaba kuli haifi bupaki kakutala, kakuli buñata bwa baana bazinyazinya kuya kwa mulao, mi lipiho zeñwi ze ama baana ni basali hali bihiwangi.
“Butata bobuñwi kibwakuli bamutayi wakulwanisa bubangoki mwahala baana ni basali babelekela mwamuzuzu osinani. Hakuna hande silelezo, mi mubeleki hasweli kuikambota ni mubilaeli wakona kuutwa makande abona hofita,” nekubulezi Tawana.
Mwalilimo zetalu zefelile kubonahalile kufukuzeha kwa lipiho ze bihiwa mwasikiliti. Mwa silimo sa 2022 nekubihilwe lipiho ze myanda yemilalu kazesilezi, mwasilimo sa 2023 neli zemyanda yemibeli kazemashumi alobañwi kazelobapeli, mi mwa silimo sa 2024 lipiho neli kutezi hape fafasi mi nekubihilwe ze myanda yemibeli kazemashumi asilezi kazelobañwi.
Nekufitisizwe lipilaelo hape zabatu babasabihi likezo zabubangoki mwahala baana ni basali, ni babañwi babakwalisa lipiho kasamulaho akubiha. Mungendenge wakulwanisa bubangoki mwahala baana ni basali usweli ku etelelwa ki likolo la mañusa ni zwelopili ya bulyambombola hamoho cwalo ni likolo la kulikanelela kwa baana ni basali ni pabalelo ya banana.