KATIMA MULILO – Kasamulaho aliviki za kulyanganiswa bakeñisa mulilo one usinyize ofesi ya katengo ka tolopo mokubulukwa mapampili ni milelo, katengo katolopo ka kalile hape ni lisebelezo za milelo. Lisebelezo neli kalile viki yefelile kwa muyaho wa swalelele kwa Wooden Bridge, kulatelela mulilo one u ezahezi la 24 Yenda.

Sibuabui wa katengo katolopo Chrispin Muyoba, nanitifalize kuli lisebelezo likalile kwa muyaho wa swalelele, mi neli tukelo habanze balika kulukisa muyaho one ucisizwe ki mulilo. 

“Mulilo nosinyize hahulu liofesi za luna za mutayi wa milelo, kuluhapeleza kuli lisebelezo zeo luli lilimanise swalelele,” nekutolokile Muyoba.

“Ki tabo kulemusa bayahi kuli lisebelezo kaufela likana li ezahala kwa muyaho wa Wooden Bridge. Lu itumela kwa swalisano ya sicaba kanako ye tata ye.” Bayahi batolopo sebakona kufumana lisebelezo za butokwa ze cwale ka kutambeka milelo ya kuyaha, kulemuha limapo za mubu wa bona, ni zeñwi cwalo. 

Mulilo wa kweli ya Yenda no tisize lipilaelo kwa sicaba. 

Kanako ya mukopano wa sicaba viki yale, likwambuyu wa zwelopili ya libaka za litolopo ni matakanyani James Sankwasa naize mulilo neli kezo ya mwahali, kamulelo wakubata kusinya bupaki. 

Manzwi ao atisize ngambolo mwa tolopo ni haike hakuna lipatisiso za simubuso zepatalalizwe.