KATIMA MULILO – Muzamaisi watolopo ya Katima Mulilo, Raphael Liswaniso, unyazize likwambuyu wazwelopili yalibaka zalitolopo ni matakanyani James Sankwasa, kuli nasundile katengo katolopo ya Katima Mulilo kuli kamulilimanise hape famusebezi, mazazinyana amano fumana tulo mwakhuta yetalima lipilaelo zababeleki. Hane abulela ainzi ni muyemeli wahae wamulao Victor Kangumu viki yefelile, naize kulilimaniswa kone kunyatezwi la 13 Lungu 2026 kusikami mi kunyazeleza tukelo yamulao.

Misunga yeo izwelela la 28 Yenda 2025, Liswaniso hane akile alilimaniswa famusebezi kusina tuwelo. Kasamulaho lingambolo ni katengo katolopo lipala, Liswaniso nakile aliba kwaofesi yebona zalipilaelo zababeleki. Kutisano yalipilu nepalile mwakweli ya Njimwana 2025, kacwalo taba yakena mwakhuta yamuatuli yabona zalipilaelo zamusebezi mwakweli ya Yowa 2026.

 Kakuya kakatulo yene filwe kimuyemeli mwakhuta yetalima zamisebezi la 8 Lungu 2026, kulilimaniswa kwa Liswaniso nekufumanwi kuli nekufosahezi, kacwalo khuta yafa taelo yakuli kufeliswe nikuli Liswaniso akutele famusebezi, nikuli alifiwe masheleñi kaufela ane aswanela kufumana nako yana lilimanisizwe famusebezi.

Kono mwaliñolo lene liñozwi la 13 Lungu 2026, Sankwasa nanyatezi kulilimaniswa kokunca mi nako ye inge ahola tuwelo yahae, mi meya watolopo yaKatima Mulilo Kabende Kabende azwelapili kufa Liswaniso liñolo la kumulilimanisa lizazi leliswana. Kono Kangumu ubulela kuli taba yeo yamakalisa mi iloba mulao. “Kubonahala kuli liñolo lene linyatezwi kilikwambuyu, lisupeza kuli mutomopuso wanaha Namibia umwa kozi, kamaiso yamulao, mi hape isheununa kamaiso yamulao,” nekubulezi Kangumu.

Liswaniso mwamanzwi ahae naize bakeñisa kuli mwaliñolo la likwambuyu kuna ni manzi atwi: “munge taba ye kuba yaputakao,” atisa lipilaelo zakuli likwambuyu nasunda katengo katolopo kuli kamulilimanise. Naekelize kuli sina muokameli swalelele yana keteilwe ki ikwambuyu hane abile yena wakulilimanisa Liswaniso, kwalukela kuli kulilimaniswa kwacwale kitaelo yezwelela kuSankwasa kuli ataleleze muhupulo wahae.

“Liñolo kuzwelela kumeya kikelezo yezwa kulikwambuyu. Nihane ikaba kuli katengo neka ñolezi likwambuyu liñolo, kubonahala fokusweu kuli mwakalabo yahae yakuli ‘munge taba ye kuba yaputako’ kusupeza kuli nasusueza katengo katolopo kuni lilimanisa famusebezi,” nekubulezi Liswaniso.

Hane akupilwe kualabela falitaba zeo Kabende naize hakuna buniti kuzona. “Maikuto aLiswaniso ni muyemeli wahae ababata kukasheza fapili haki aniti. Katengo katolopo neka inzi nikunga muhato, mi kañolela likwambuyu kuli anyatele. Kitaba yena nikulatelelwa kakuli hamukoni kulilimanisa muzamaisi wakatengo katolopo likwambuyu asika nyatela,” nekubulezi Kabende

Naize tulo yaLiswaniso mwakhuta yebona zamisebezi ishutana ni milatu yemashumi amane kayemine yanyazwa kayona. “Selubata kikuli taba yahae ifele. Hakoni kukutela famusebezi bakeñisa situlo sahae, kakuli akaswana aisilinga ni lipatisiso,” nekubulezi meya.