BUNYA – Ehangano lyoRossing Foundation olya longitha  oshimaliwa shi vule poomilliona N$14 okuhwepopaleka onkalo yoosikola osho wo oshigwana sha taalela onkalo itaayi hokitha.

Ehangano lyoRossing Foundation olya ti sigo oompaka olya longitha oomilliona N$14 okutunga nokulundulula oonkalo dhoshigwana miitopolwa ya yooloka yoshilongo.

Oya fatulula kutya elalakano lyoproyeka ndjika okuyambidhidha nokuhwepopaleka onkalo yaamboka taya pumbwa omayambidhidho, unene ngashi koosikola dhi li kuushayi osho wo moshigwana.

Omunambelewa omukuluntu mehangano lyoRossing Foundation Laina Hakweenda okwa fatulula kutya ehangano lyawo olyi lile po okuyambidhidha mboka ya taalela onkalo ondhigu opo ya longekidhe nawa oonakuyiwa dhawo.  

Hakweenda okwa fatulula kutya, iilonga yawo oyi shi okutumbulwa koosikola n dhoka dhina aanona ya za komagumbo kaaku na onkalo tayi hokitha osho wo mboka taya ithanwa ongaadhinwa ngaashi osikola yopaumwene Nakayale yi li koRuacana osho wo Bunya Combined koshitopolwa shaKavango West.

“Osikola Nakayale ohayi tambula ashike oothigwa osho wo mboka yaa na esiloshimpwiyu lyaakuluntu yawo omolwomatompelo ge li po, omanga kosikola Bunya Combined, aanona oyendji taya hiti hoka, nayo oya za komagumbo kaaku li nawa” ta fatulula ngaaka.

Ta ti sho shoka ya totha mo okukwathela oosikola ndhoka naashoka taya pumbwa unene, opo ya kwathele aalongwa mboka osho wo osikola dhoyene.

Omupevikuluntu gwosikola yopaumwene Veronica Haimbondi, okwa ti osikola yawo oya ikolelela ashike momakwatho haya mono okuza komahangano ngaashi ngaka goRossing Foundation.

“Osikola oyi na ashike aanona ya za komagumbo kaaku na esiloshimpwiyu osho wo oothigwa onkene ohatu ya pe kehe shimwe okutameka kiikutu, iikulya osho wo ofuto yosikola,” ta popi ngaaka.

Onkene omakwato ga tya ngeyi ohaga yambidhidha unene nokukandula po omikundu dhe ya taalela,” ta fatulula ngaaka. 

Omulongwa gumwe posikola mpoka, edhina lye itaali vulu okutumbulwa, okwa hokolola nkene osikola tayi dhana onkandala monkalamwenyo ye.

“Onda kanitha aakuluntu yandje ihe osikola ndjika oya kutha ndje po nokusilandje oshimpwiyu, ihe ngeno okwa li hayo ngeno kandili ngaa momaandaanda,” ta popi ngaaka.

Omukuluntusikola posikola Bunya Combined Wellem Kotokeni okwa ti osikola yawo oya taalela omashongo ogendji, onkene oya pumbwa omatungo ngaashi omuhandjo gwokuza ehala lyokulila aalongwa osho wo oongulu dhosikola.

“Aalongwa otaya ende iinano iile, ookilometa 30-35 okuya nokugaluk,vyo oyeli mongulu yathinana, shoka tashi vulu okunkundipaleka eyilongo lyaanona,” ta popi ngaaka.

Ta pandula ehangano lyoRossing Foundation sho lyina edhilaadhilo okuya mbidhidha mpoka taya vulu nonando itali ka gwanitha po oompumbwe adhihe ya taalela. 

Omulongwa gumwe posikola Mbunya, okwa popi kutya onkalo ya taalelwa kosikola, itayi etitha oonkondo. 

“Otundji ohatu zi kokule, tatu ende iinano ile, ihe ngeno okwa li tuli momuhandjo ngeno, otashi tu kwathele noonkondo,” ta popi ngaaka.

-vkaapanda@nepc.com.na