OSHAKATI – Opolisi yaNamibia oya lopota aantu yatatu ya hulitha nayaali ya ehamekwa, miiponga yiihauto mehuliloshiwike pokati kOmungwelumwe nOshakati.
Sha ikwatelela kiiningwanima ya holoka mehuliloshiwike, aalumentu yaali oya li ya pumwa kohauto sho ya li taya ende kooha dhopate.
Gumwe anuwa okwa si ethimbo olyo tuu ndyoka omanga gumwe ta mono uuhaku, e li monkalo ombwiinayi moshipangelo shaShakati.
Omuhingi gohauto ngoka a mangwa po anuwa okwa li ta hingi okuza kOmungwelume a uka kOshakati.
Nakusa okwa tseyika nedhina Nikanor Mekondjo gwomimvo 25 a yambukile kOmbalala.
Moshiningwanima shimwe okanona komimvo heyali oka si ethimbo olyo tuu ndyoka sho ka lyatwa kohauto omanga ke li nayina.
Oshiningwanima shoka osha holoka mondjila okuza kOshakati okuya kOshikuku.
Opolisi inayi yelitha kutya okanona oka lyatwa ngiini, manga ka li pamwe nayina.
Nakusa okwa tseyithwa nedhina Matheus Halweendo.
Natango opolisi oya lopota oshiponga sha holoka mondjila yOmungwelume okuya kOshakati sho ohauto yowishi yali yi idhenge momuti konima ya gu kopate.
Opolisi oya ti oshiningwanima shoka osha holoka Olyomakaya.
Otaku hokololwa kutya omuhingi gohauto anuwa okwa li a ndopa okupangela ohauto e tayi galangata ko iikando itatu omanga inayi idhenga momuti gu li pooha nopate.
Omuhingi gohauto anuwa okwa li a falwa koshipangelo hoka a ka hulithila, omanga naku faalelwa ta mono uuhaku moshipangelo shaShakati e li monkalo ombwiinayi.
Nakusa okwa tseyika nedhina Stefanus Stefanus.
Aakalimo yomomikunda Ompumbu, Okaku kaNangula, Onampinda nomikunda dhi li popepi nondjila yokuya kOmungwelume, oya ti aantu oyendji oya kanitha oomwenyo mondjila onene yi li pokati kOshakati nOmungwelume oshowo Oshikuku.
Opolisi moshitopolwa shaShana oya ti omwedhi ihagu piti po, inaaya lopotelwa omuntu nenge aantu ya lyatelwa mondjila ndjoka, nenge oohauto dhi idhenga mumwe.
Opolisi otayi kumagidha aakalimo yomomikunda Ompumbu, Okaku kaNangula, Onampinda nomikunda dhi li popepi nondjila yokuya kOmungwelume ya kale taya tala nawa oohauto uuna taya taaguluka opate osho wo aahingi ya hulithe po okuhingilila.
Omukuluntu gwopolisi moshitopolwa shaShana Naftal Lungameni Sakaria okwa popi ta ti ondjila ndjoka oya faalela oomwenyo dhaantu oyendji omolwiiponga yiihauto.
“Ondi uvite kutya ondjila ndjoka oya pumbwa okutulwa uutuntu wokushunitha pevi ondapo yoohauto owundji,’’ ta popi ngaaka.
Sakaria ta ti, oya ndhindhilike wo kutya iikolitha oyo tayi dhana onkandangala mokweetitha iiponga mbyoka.