Mukurona govaporosi moNamibia, Lietenant General Joseph Shikongo kapandwire vaNamibia komukaro ogu kavalikidire mosiruwo sokulira nakufa gwetu Presidente gwanare gokuhova, Sam Nujoma. Shikongo kapandwire vaNamibi a kononkedi edi kavalikidire posiruwo sokukahoreka Nujoma, ogu gadiogorokere momazuva 8 Murongankuru 2025. 

Mokukwama mwendi age Shikongo, vaporosi kwakere komavango nagenye mwaza sirongo vagave epopero nompora. Rutu rwaNujoma kwarutwere konomukunda ntambali edi dina kara asi Omusati, Ohangwena, Kavango East, Zambezi, Otjozondjupa, Erongo ntani Kharas, komeho nye rukatengura koVenduka momukunda gwaKhomas. Nkenye oku vazire rutu rwendi kwakere megendeso lyovakwayita ano rutu kwarere nye mevango lyepangero mekeverero lyovakwayita vaNamibia omu vapulisilire vaNamibia vagave mfumwa zawo zokuhulilira. ‘’ Yipo nye asi nahepa kuyudidilika nokugava mpandu, zina kutunda komutjima gwange, omu vaNamibia kavakere nomukaro gomuwa unene. Kapi katukere noudigu wangandi. Mpandu, vaNamibia twahepa kuza komeho nomukaro gwangesi, koyihorokwa yangesi nayimwe hena ngoso. Twahepa nye kuyindindira asi vagenda vetu ngava katante asi Namibia sirongo sompora yimo ana kutanta ngoso Shikongo. 

Age kahuyungire kwaNampa momapeu kohemo tupu nokusika siruwo esi katuzire nye tuka horeke Sam Nujoma, koHeroes’ Acre moVenduka. Shikongo simpe katente asi vaporosi nawo kapi kavagwanekerere noudigu nkenye wokuhamena koukorokotji kutunda tupu apa kavazire komukunda dokulisiga siga vatunde moVenduka. ‘’ Elikwamo lyokutwara simpu konomukunda kwatameka mo 20 Murongankuru 2025 kutundilira kokapare kaHosea Kutako gonodira. 

Ame nakakerepo apa sakasikire simpu kokapare kokoOndangwa nokutwikira nye tukaze koOkahao. Elikwamo kaligendere nawa.’’ Yimo ana kutanta ngoso. Eyi kayininkisire kukara yihorokwa dona nkenye yoytiseu, vaNamibia kavalituliremo asi twahepa kulira Nujoma gwetu nefumadeko nalinye. –Nampa 

Efano: Heather Erdmann