Auleria Wakudumo
Ouministeli woikwameni neameno lokeengaba owa kunghilila ovalihomboli opo va kwatafane nombelewa yavo opo va kwashilipaleke kutya eehombo davo oda didilikwa momikanda dokomalungula douministeli.
Ouministeli owa kunghilila ovalihomboli ngaha, sha landula etumwalaka li li pamukalo wokakwatamawi tali andjakana komalungula, tali holola kutya vati ovalihomboli ovo ve na odjapo yehombolo i na oluvala lishunga inava shangifwa pambelewa ngaashi shi na okukala nova pumbwa vati oku ke lishangifulula.
Okakwatamawi oka andjanekwa komapandja okomalungula ngaashi koFacebook, TikTok osho yo koWhatsApp.
Momukanda wa pitifwa komukulunhuwiliki mouministeli Daniel Nghidinua, ouministeli owa yelifa kutya owa didilika ovahombolifi vamwe ihava twala omadina ovalihomboli pefimbo ngaashi sha ufwa koveta.
“Okutwala omadina ovalishangifi veehombo kwa lata ile efimbo limwe inaa shangifwa nande nande oko haku eta eehombo dimwe di kale inadi didilikwa momukanda wouministeli woikwameni pefimbo ile nokuli di kale inadi didilikwa,” omukanda tau holola ngaho.
Nghidinua okwa holola kutya ovalimboli ohava hombolifwa kumangestrata vokuhombolifa oshoyo kwaavo va inekelelwa oshilonga shokuhombolifa momaongalo unene ovafitaongalo sheli kwatelela kokatendo 40 (kativali) keendjapo domadalo, deehombo oshoyo eendjabo domafyo ko 1963.
Keshe omuhombolifi okuna oshinakuwanifwa shokukwashilipaleka kutya na kale ena ombaapila yehombolo (ocopy) nokutwala odjapo yoovene kombelewa youministeli oule womafiku atatu.
Ouministeli ohau kwashilipaleke kutya ondjapo ya yandjwa oili mondjila omanga inava shangifa momushangwa wouministeli.
Ouministeli otau indile ovalihomboli opo va kwatafane neembelewa doikwameni okukwashilipaleka ngeenge eendjapo davo deehombo oda twalwa ngaho nokushangifwa momikanda douministeli.
Eshi ouministeli owa ti okulishangifa okwa fimana molwa oumbangi oshoyo okukala vena omivalu dovalihomboli dili mondjila.
Ouministeli otau indile yo ovakwashiwana opo va koleke ouyelele nouministeli omanga inava andjakaneka omapopyo taa pukifa oshiwana.