OSHAKATI – Aaleleli yopaitopolwa oya kumagidha aakwashigwana ye li pomahala haga yelulwa kefundja opo ya kale ye li uupathi oshoka omeya ngoka taga matuka miishana oge li mumwe nefundja.
Ngoloneya gwoshitopolwa shaMusati Erginus Endjala okwa kumagidha oshigwana shi kale uupathi opo shi tembukila komahala galwe okuyanda ekanitho lyoomwenyo osho wo iinima yawo. Ta ti oshigwana inashi tegelela sigo kwa toka opo shi tembuke, uuna sha lopotelwa kutya efundja olya thika popepi, ta ti oshitopolwa she osha adhika kefundja, noya tembudha nale aantu yamwe. Ngoloneya gwoshitopolwa shaShana Elia Irimari okwa ti efundja ohali halakanitha olukanda Oshoopala mOshakati.
Ta gwedha po ta ti, oya kala nokukundathana nelelo lyondoolopa yaShakati nkene ye na okuhulitha po uupyakadhi mboka hau kala po omolwefundja omumvo kehe.
“Omeya ngoka ohaga etelele omayoka niilikama yimwe yi ili onkene otatu indile oshigwana shi kale sha kotoka,” ta kumagidha ngaaka.
Okwa indile wo natango aakalimo mboka ye li pomahala haga adhika kefundja ya tembukile komahala ga londa omanga kuyele.
Omunambelewa omukuluntu gwelongo koshikondo shomalongekindho moshitopolwa shaHangwena Omri-onn Kavandje okwa ti, omeya oga patitha oosikola moshitopowa shawo.
Omunawino gwomeya omukuluntu muuministeli wuunamapya, oohi, omeya niikwamavi Leonard Hango okwa koleke kutya omeya gefundja oga thika miitopolwa yokonooli.
Hango okwa fatulula kutya efundja olya ziilile koAngola sho omeya gomvula onene ndjoka ya loko moAngola ogo ga li ga udhitha omulonga omunene gwaCuvelai ngoka ga piti sigo okoongamba e taga yi mumwe nomeya gomvula taga kunguluka miishana.
“Omeya gomvula onene ya loko moAngola, oga piti okuza komilonga ndhoka dhomoAngola sigo ga udha oondama dhoka dhi li ndatu, sigo omuundama uushona mboka wu li poongamba dhaNamibia naAngola,” ta ti ngaaka.
Hango ta ti, poongamba mpoka opo nduno pwa zi iishana mbyoka hayi endele omeya gefundja miitopolwa ya yooloka moNamibia, ngoka haga ka tsakanena momulonga gwOkuma sigo Etosha Pan, ngoka ga ka ya sigo okefuta lyaAntlantic.
Okwa gwedha po ta ti okuza iiwike ya zi ko omvula onene oya kala tayi lopotwa moAngola.
“Sho omasiku ga kala gu uka komeho nomuloka omunene, omakuthikuthi oga kala nokuudha iishana miitopolwa Ohangwena nOshana sigo ga ka thika kOmusati nOshikoto.
Hango ta ti otaya kala taya tseyithile oshigwana shoka tashi holoka po.