OSHAKATI – Aalanduli osho wo aaholi yetanga lyokoompadhi oya kumagidhwa ya lande uutekete woku ka tala omaudhano pokati koosipana Chula-Chula noKK Palace mboka wu li ko Osoondaha yomasiku gahetatu gaFebuluali omanga wu li kombiliha, kositola Model.

Omunambelewa gosipana KK Palace, Johannes Kambonde ngoka oye e lile omalongekindho komeho okwa ti oya gandja ethimbo koshigwana opo yi ilandele uutekete mositola, oshoka pomweelo otayaka pula N$100.

“Uutekete otau landithwa sigo Osoondaha potundi 15h00. 

Otwa gandja ethimbo lya gwana opo kehe gumwe a mone ompito yokulanda okatekete ke, natango otatu yanda okutaamba oshimaliwa pomweelo oshoka osha nika oshiponga,” ta fatulula ngaaka.

Ta ti, otaya ka gandja wo iikunwa kaalanduli yotango ye li 240 pomweelo, shoka otaye shi nigni okuuvitha nawa aalanduli yawo, onkene otaya hiya oshigwana shi thike mengungo esiku ndyoka.

Kambonde okwa ti natango otaya hiya kehe ngoka a hala okukaninga omangeshefelo ge opo a ninge omayindilo konomola ye yopeke, 081 200 5258.

“Okatala oke na ashike N$700 nomahala opo ge li ga gwana, onkene longitheni ompito ndjika oshoka oshigwana oshindji otashi ka thika,” ta ti ngaaka.

Okwa fatulula wo kutya, nonando pe na mboka taya nyenyeta kutya oya ninga ofuto yopomweelo ondilo, halyo elalakano. 

Kambonde okwa ti, ndika olyo ethimbo okugongela oshimaliwa oku yambindhindha, oshoka kayena mpoka haya kutha iiyemo oku yambindhindha oosipana oshowo okugwanitha po oompumbwe dhilwe. 

-vkaapanda@nepc.com.na