11ǁî Mainǂharugub ǁGauǂuidi tsî Konferensis hîa ǂoa wekheb Donertaxtsēs ai ge !gûǀams ge buruxa ǂkhâ!nâsa ǁgauǂui-aona xu ge !khō!oa, ǁnāpas ai!â ge hâ i !gôagu hoaga ge ǁgoeǂamse. Nē !nās ǁgauǂuidi ge 199 ǁgauǂui-aon hîa 317 ǁgauǂui!khaide ge ūhâ in xa ge -ǁhao!nâhe hâ i, ǂoa ge kurib !nân ge 162 ǁgauǂui-aona 268 ǁgauǂui!khaide ūhâ i hîa. 

Nē !gôagu ge 22.8%gu di ǂharosa ǁgauǂui-aon !gâi!gâibasens !nâ ra ǁgau tsî 18.3%ga ǁgauǂui!khaigu !gôab !nâ. 

ǂOa ge wekheb Wunstaxtsēs di ǂhanusi ǁkhowa-ams nē ǁgauǂuidi dis tawab ge, Zebra Kaseteb, Maindi ǀHûs Namibiab dis di presidenta ge mî, mûmûsa ǂauna !gôab !nân ǁgauǂui-aon Afrikab !Khawagas Omkhâisens ǀHûhâsib (SADC) ǂharugub ǂnûiǂgāde xu hā hâsa tsî !auga!hūga xus tsîna. 

ǀGamdisiǀgamǀa ǁgauǂui-aon ge SADC xu hâ tsî !nonana !auga!hūgu ǂnûiǂgādi ǂharugu-aon ase, !gau ra ǀammi a Namibiab di ǂnûiǂgāse.  ǀGuitimî tsîs ge a !huisa xus ge Mainǂharugub ǁGauǂuidi tsî Konferensisa ra ǁgūba, Namibiab mainǂharugub !khūōgā hâ ǁuiba !âǀhuru-aon tsî !hūǁîna mâi-ai!â tsî ǁkhāti !nāsa ǂansa mainǂharugub ǁaxasin ǂnamipe !hūǁîn tsî !gâi!gâibasensa ūhâ ǂharugub ǂnûiǂgāde māsa, hâ ǁkhā a !ēde nî sîsenūse. 

Nētib ra mainǂharuguba !gâise ǀomkhâi soab !nâb ge Kaseteba gere dî, mâ ǀgaub !nân !hūǁîna kurus ǂnamipeb di ǁuiba xu nî domdore !khaisa, teksmaridi ǀguide xus ose xawe tani!kharuhesa ǀgaugu !nâs tsîna. 

Nē dîs aib ge ǁîba gere mîs ge, hāǀaro ra maindi nî ǁuiba ǂanǂuihe tsî ǂoaxa-ūhe tsî sao rase, ǀnai hâ maindi di ǂâuǀoasase sîsens ǁaega noxopa ga ǀarohesa. 

Kaseteb gere mîs ge, îb tā ǂhanuba teksmātare-aon maridi ǀkha mainǂharuguna ǂoaxa-ūs ôa!nâdi ǂgaesa ǁkhowa-am, xawen Namibiaǁîna ǁkhāǁkhākhâihe tsî hoa !hūbaisise marisihuib ǂganamsende dī tsî ǁnā marin ǀkha sîsenna dī. 

ǁÎb ge Epangelo Mainǂharugub ǂNûiǂgās  tsîna ǀawemā tsî gere mî, îs !gûǂgarob Brazil’s Vale diba sao tsî nē ǀgaub ai mainǂharugub !khōǂgā hâ !gâi!gâna khoraǂui. -Nampa