Ovanhu 300 ve na omaulema a yooloka ova tumbalekwa konima eshi va pewa omakwafo oikulya, oidjalomwa, omamango, outemba noikumbafa Olomakaya komukunda Omalindi koshitukulwa shaShikoto.
Petrus Nangolo a shivika nawa Makity oye umwe a tota po endiki lokuyambidida ovanhu ve na oulema noshoyo okuyandja ehongo nouyelele.
Okwa ti ovanhu ve na oulema va dja komikunda da yooloka ohava mono omakwafo okudilila pendiki opo. “Endiki letu oha li yandje omakwafo ngaashi okutelekela ovanhu oikulya, okukoshelwa oidjalomwa nokuyandje eetundi dokuvalula okushanga nokulesha kounona ve na oulema,” ta ti.
Okwa hokolola ta ti omudo keshe ovanhu ve na oulema ohava ningilwa oshitufi shedalo lomukulili omo ha pewa omaano.
Nangolo okwa ti okwa didilika ovanhu ve na oulema va taalela omashongo a yooloka unene tuu ovo ve li komikunda.
“Osha fimana ngeenge hatu yambidida ovanhu ve na oulema. Ovanhu ve na oulema ova pumbwa okuulikilwa ohole,” Nangolo ta ti.
Okwa ti ovanhu ve na oulema ova ninga oihakanwa yokuhepekwa momaumbo omanga vamwe kave na ovayambididi momaumbo.
“Ohandi ka kongo omakwafo moshiwana ngaashi outemba opo ndi dule okuyandja kovanhu ve na oulema. Ondi undite etumba okuyambidida ovanhu ve na oulema shaashi ohandi shi ningi nohole nolukeno,” ta ti.
Okwa indila moshiwana kwau e na ehalo lokuyambidida endiki opo shi kwatafane nombelewa yakansela waKankolo.