OHANGWENA – Omunambelewa wouhaku koshitukulwa shaHangwena Dr Odon Nkongolo okwa ti omivalu dovanhu va kwatwa komalaria oda wedelwa moule woivike ivali omo ovanhu 428 va lopotwa novanhu vavali va xulifa.
Okwa ti mopaife ngaha kOhangwena okwa lopotwa ovanhu 3 483 va kwatwa komalaria novanhu vahamano va xulifa.
Omukulunhuwiliki wouhaku koshitukulwa shaMusati, Alfons Amoomo okwa ti oshivike sha dja ko moshitukulwa shaye omwa lopotwa ovanhu 80 va kwatwa komalaria.
Okwa yelifa paife okudja omudo wa dja ko fiyo omwedi ou moshitukulwa shaye mwa lopotwa 583 va kwatwa komalaria.
Okwa ti omafyo aheyali okwa lopotwa omudo wa dja ko.
Amoomo okwa weda po ta ti momafyo ovanhu va fya komalaria omwa kwatelwa ovanhu vatatu vovakwashiwana Ovaangola nosho yo ovanhu 52 va kwatwa komalaria.
Omukulunhuwiliki wouhaku koshitukulwa shaShikoto Joshua Nghipangelwa okwa ti oshivike sha dja ko koshitukulwa shaye okwa lopotwa ovanhu 79 va kwatwa komalaria.
Okwa ti ovanhu 13 kave shi Ovanamibia.
Ovanhu 13 ova tambulilwa moshipangelo tava pangwa malaria.
“Paife ngaha kOshikoto oku na ovanhu 799 va kwatwa komalaria nomafyo ovanhu vahetatu,” ta ti.
Ounona, ovanhu okudja peedula 20 fiyo 40 ovo unene va lopotwa va ninga oihakanwa yokukwatwa komalaria.
Omukulunhuwiliki wouhaku koshitukulwa shaShana, Johanna Haimene okwa ti moule woivike ivali moshitukulwa shaye inamu lopotwa ovanhu va kwatwa komalaria.
Okwa ti okudja omudo wa dja ko omwedi Kotoba omwa lopotwa ovanhu 78 nomafyo ovanhu vatatu mOshana.
Haimene okwa ti ovanambelewa vouhaku moshitukulwa shaye otava longo nondjungu okukondjifa malaria momidingonoko.
Nghipangelwa okwa lombwela oshiwana opo shi liufe komilandu dokukelela malaria nosho yo okulopota pefimbo ovanhu tava ulike omadidiliko amalaria.
Okwa ti osha fimana ngeenge omunhu a kwatwa komalaria ile ta ulike omadidiliko ta lopotwa pefimbo opo a dule okupewa omayakulo opaunamiti.
“Oshiwana nashi longele kumwe novanailonga vouministeli wouhaku, ovanhu nava topolelafane ouyelele nehongo momikunda kombinga yamalaria,” ta ti.
Okwa ti ouministeli wouhaku onghee ngaa tau twikile nokuyandjaneka eenete dokukelela eemwe nosho yo oprogarama yokupombela momaumbo nokuyandja ehongo nouyelele.
Okwa ti ovanhu nave lituvikile neenete dokukelela eemwe.
“Oshiwana nashi longele kumwe novanailonga vopombela molwaashi osha fimana ngeenge momaumbo tamu twimikilwa opo ku kelelwe etandavelo lomalaria,” ta ti.