KATIMA MULILO – Mapokola mwasikiliti saZambezi bapatehile ni mungendenge wakulwanisa kuyamba isi kamulao. Yomuhulu wasipokola mwasikiliti Julia Sakuwa-Neo nabihile kuli  la 24 Kandao, limembala zasipokola kwaKasika ni Impalila kaswalisano ni sipokola sa mwamezi nebabile ni mungendenge wakulwanisa kuyamba isi kamulao. 

“Nekubile ni museco kwamunzi waKasenu, mi nekufumanwi mandui babayamba isi kamulao. Mandui babañwi nebafumanwi kwamukulela wanuka ya Chobe, mwasilalo sa Nakabolelwa mi kaufela nebaamuhilwe tunyandi. 

Mungendenge oswana noyandulukile mwabala kuzwelela nuka yaChobe, kukala Impalila kutisa Nakabolelwa,” nekubulezi Sakuwa-Neo mwapiho.

Mwapiho yeshelana ni yeo, kukenya lika zehanisizwe isi kamulao seli nto yebilaeza kwasiteshini sa mapokola mwa Katima Mulilo. Nihakulicwalo mapokola basweli kusebeza katata kutibela bubangoki bobucwalo. Lasunda viki yefelile la 24 Kandao babakulubelwa babalalu nebakile batamiwa kasamulaho bafumanelwa matokwani apatilwe mwalikala zalico kanako yakupotela mapantiti, mi zeo neli isezwa mapantiti.

Sakuwa-Neo nanyatezi taba yeo mwapiho yana file kwababihi bamakande. Naize bane batamilwe neli musali walilimo zemashumi asilezi ili muyahi wanaha Namibia, ni musali walilimo zemashumi amalalu kazetalu ili muyahi wanaha Zambia, hamohocwalo ni mutangana walilimo zelishumi kazesupile ili muyahi wanaha Namibia. 

“Sicaba sielezwa kuambuka likezo zakubata kukenya lika zehanisizwe mwasitokisi, babakafumaniwa baeza cwalo bakatalimana ni buhali bwamulao kakutala,” nekubulezi Sakuwa-Neo. Babalalu nebalibelezwi kubonahala mwakhuta yenyinyani ya Katima Mulilo Labubeli.