OMEGA 3 – Kwa matakanyani amunzi wa Omega 3, mwa sibaka sa pabalelo ya lifolofolo sa Bwabwata mwa sikiliti sa Zambezi, maticele kwa sikolo sa Ndoro Memorial ha ki maticele feela kono kona ba ba tusa sicaba mwa linako za putako. Bakeñisa kutokwa lisebelezo sakata za makete ni linzila, maticele kamita basebelisa limotikala za bona kuisa limembala za sicaba babakula kwa sipatelanyana se sili bukaufi ili libima zemashumi aketalizoho kwa Chetto. 

Muzamaisi wa sikolo swalelele Rhonnel Sikenda, natolokile butata sikolo ni sicaba batalimana ni bona zazi ni zazi. “Limotikala za maticelee kona zetusa sicaba,” nekubulezi Sikenda. Hañata maticele baeza cwalo basatokwi kulifiwa sesiñwi, kakuli buñata bwa sicaba haba kwanisi kulifa. “Haiba yomuñwi inge akula, sicaba bataha kwa sikolo kuto kupa maticele kuli bamuise kwa sipatelanyana. Hakuna yatusa kuleka mafula hakulongiwa babakula. Ki maticele feela ba baitombola kutusa sicaba,” nabulezi.

Taba yeñwi kikutokwa maino amaticele, kacwalo baikahela mandu akumateha. Baituti babañwi balobala feela mwa matente amanyinyani. “Ki kozi kakuli batu ni lifolofolo zanaheñi za fita. Baituti babañwi balobala mwa matente amanyinyani asakwali hande. Tibelelo yakuli maino abaituti akwalule kiye tuna,” nekubulezi Sikenda.

Mubuso upatehile kuyaha muyaho wa maino abaituti wa mayemo apahami. Muyaho ubonahala kuli sebato feela, mi kusialezi feela kubeya lisebelezo za mezi. Haiba lika inge lizamaya hande muyaho uitekezwi kukwalulwa mwa kweli ya Lungu. Sikenda nahatelezi kuli tokwahalo ya lukwakwa lwa sikolo ki ye tuna. “Lupila mwa sibaka sa lifolofolo, inge usweli kuluta lifolofolo zeswanasina bana balitou ni litongwani zafita. Lukupa masamaria babande kulu neulela lukwakwa. Kono kutisa cwale hakuna ya ipapatile kulutusa,” nabulezi.

Kwanda lipilaelo za buiketo sikolo hape hasina hande mezi akenile akona kusebeliswa ki sicaba. “Mezi alusebelisa acinca mubala. Hamukoni nihaike ku abilisa ni kunwa. Luyoshimbanga mezi akunwa ku zwa kwa Katima Mulilo halukuta kwa mafelo aviki. Muyaho wa maino omunca ulibelezwi kutatulula butata bwa mezi kakuli kukaba ni liliba zepeli ili taba ye katusa cwalo ni sicaba ses sili bukaufi.