Oshivike sha djako okwa lopotwa Ovaangola hava landifile momapandaanda 19 va kwatwa po koshitukulwa shaHangwena pefimbo loshikonga shopolifi.
Komufala wopolifi moshitukulwa shaHangwena, Commissioner Ottilie Kashuupulwa okwa ti Ovaangola 14 ova mangululwa ashike ova pewa oule womafiku avali va kale va fiye po Namibia.
“Ovaangola vatano ove li modoolongo molwaashi ova dina opolifi eshi va kunghililwa lwoikando ya yooloka kopolifi va dje mo moNamibia ashike ina va hala,” ta ti.
Ovaangola 15 okwa telwa kEenhana omanga vane okwa telwa kOkongo.
Opolifi okwa li tai ningi oshikonga shokulela oimbuluma she dina Twahanganeni.
Kashuupulwa okwa ti oshikonga otashi twikile okuningwa nelalakano lokukande oimbuluma moshitukulwa.
Okwa ti omwedi wa djako moshitukulwa shaye ina mu lopotwa oimbuluma ihapu osho tashi ulike kutya opolifi otai longo nondjungu okukandeka oimbuluma efimbo keshe.
Okwa kumaida oshiwana opo shi twikile okulongela kumwe nopolifi okukandeka oimbuluma momidingonoko davo unene okuyandja ouyelele.
“Oibofa nai lopotwe pefimbo opolifi i kale ya kufa onghatu diva,” ta ti.