ONGWEDIVA – Batu ba mashumi alobapeli nebatimezi falikozi za famukwakwa kukala la 15 Njimwana 2024. Lipiho za simubuso neli patalalize. Lipiho zene patalalizwe ki sipokola sa Naha Namibia, kuzwa la 15 Njimwana 2024 kutisa la 5 Sope 2025, lisupeza kuli limotikala ze 472 ni likolofalo ze 918 neli bihilwe, ili zene tahisize mafu amashumi alobapeli.
Lipiho kuzwelela kwa kampani ya Motor Vehicle Accident (MVA) Fund lisupeza kuli batu ba 443 neba timezi mwanaha kaufela ñohola feela. Lipiho hape lisupeza kuli nekuna ni likozi za famukwakwa ze 3 160 zene tisize likolofalo ze 5 774 mwanaha kaufela. Mwasilimo sa 2023, likozi za famukwakwa ze 3 067 neli bihilwe, batu ba 5 433 neba holofezi mi ba 428 neba timezi.
Mubakweli muzamaisi wasipokola Kauna Shikwambi, naize zeñwi zetisa zeo kaufela ki bakwaezi ba ba katezi, bakwaezi babakozwi, kumatisa kufita tikanyo, kukwaeza kamafosisa kusina tokomelo, nikusa latelela maswayo afamukwakwa.
“Ba ba bona zamulao neba belekile katata kanako ya pumulo, neba file limamela ze 1 867 mi ba ba fitelela 12 000 neba bizelizwe kwa khuta. Nabulezi hape kuli limotikala ze 657 neli zusizwe famukwakwa kakupalelwa kulatelela litaelo zabuiketo.
Yomuhulu wasipokola sa naha Joseph Shikongo nafitisize pilaelo yahae kuamana ni kutepelela kwa buiketo famukwakwa. “Nieleza bakwaezi kaufela kulatelela milao ya famukwakwa kufukuza likozi ni kusa ipumana mwa kozi ni mulao,” nahatelezi.
Muzamaisi wa MVA Fund Rosalia Martins-Hausiku ni yena nakupile sicaba kaufela kusebeza hamoho kufukuza likozi za famukwakwa.
Nahatelezi hape kuli kuna ni ba beleki babalibelezi nako kaufela mwanaha kaufela ku alabela mwa linako za putako. Ili kuli likozi za famukwakwa hali ezahala basike balieha ku alabela teñi. Sicaba hape si elezwa kusebelisa nombolo ya 9682, kubiha likozi za famukwakwa ni kufumana tuso.