Johanna Kamati okwa ningi omulongwa gwomuhoko gwaayelele gwotango okuza posikola Hainyeko Combined a zala eguwo kiiputudhilo yopombanda. 

Osikola Hainyeko Combined oya li ya tungwa po ya nuninwa aayelele osho wo aalongwa ya talwa ko ye li konima yesiga, noyi li moshikandjohogololo Okongo moshitopolwa shaHangwena. 

Kamati, gwomimvo 22, okwa zala eguwo muKootomba nuumvo sho a mana eiyilongo lye koshiputundhilo shopombanda shedhina International University of Management ( IUM) koNkurenkuru, a mono onzapo yoDiploma melongo lyaanano yosikola yopevi. 

“Omuhoko gwandje, ogwa talika ko gwa yooloka komikwawo, itaagu vulu okuza omuntu ta mana osikola nenge a longwa, ihe shoka osha pe ndje oonkondo opo ndi leshe neyitulemo opo ndi kwashilipaleke kutya kehe shimwe ohashi vulu okuningwa,” ta fatulula ngaaka. 

Kamati okwa ti, aayelele oyendji ohaya thigi po oosikola  omanga aashona, thimbo limwe omolwonkalo haya kala ya taalela koosikola hoka haya ka tsikila, ngaashi okuhindwa omolwaanuwa ‘Aakwawankala’. 

Onkalamwenyo yaKamati 

“Onkalamwenyo yandje inayi kala ompu, ashike onda kala ndi itaala mungame mwene nomwaashoka nda hala. Nonando nda kala nda taalela omashongo ga yooloka, shoka inashi shololitha ndje,” ta hokolola ngaaka. 

Ta ti, okwa kala i itaala kutya ngele gumwe ote shi ningi, kehe gumwe ota vulu oku shi ninga. 

“Omolwonkalo yetu, oyendji ihaya vulu okwiindindhimikila osikola, shoka hashi ya sholololitha nokwiitaala kutya yo kaye shi aanasikola, oya pumbwa ashike okutsikila nonkalo yawo ndjoka ye li nale,” ta fatulula ngaaka. 

Ta kumagidha kutya onkalo ndjoka otayi lunduluka ashike ngele taku taandalekwa omalongo mokati kaayelele nokuuvithwa ko kutya nayo otaya vulu okweeta elunduluko moshigwana okupitila meyilongo, osho wo esimano lyelongo. 

Omukuluntusikola 

Omukuluntusikola koHainyeko Combined Sebron Ngololo okwa thamuna kutya Kamati okwa li gumwe gomaalongwa dhingi posikola yawo. “Osikola yetu oya nuninwa unene aayelele osho wo aanona ye li konima yesiga, ihe oyendji yomuyo oya hulile ondjilakati, ihe Kamati oye ashike omulongwa posikola mpaka a za po a yi koshiputudhilo shopombanda e ta zala eguwo,” ta popi ngaaka. Ta ti, Kamati okwa gandja ethano ewanawa kaalongwa aakwawo osho wo kaayelele aakwawo kutya elongo kalyi na kutya olyalye nenge lyangandi. Ngololo okwa fatulula kutya osikola yawo oyi na ashike sigo ondondo ontimugoyi. 

Ta ti, okwa li a pula uuministeli welongo opo ya gwendhelwe sigo ondondo 12, opo mboka taya thiki koondondo hoka ya mane posikola mpoka ashike.“Onda ndhindhilike kutya yamwe mboka haye shi enditha nawa ohaya ka thiga po oosikola ngele ya yi ya ka tsikile koosikola dhimwe, oshoka ohaya adha ko omashongo okuza kaalongwa aakwawo osho wo aalongi yamwe kaaye shi okulonga nayo,” ta ti ngaaka. Ngololo okwa ti, aayelele aantu yi ikalekelwa ye na onkalo yimwe yi ili, onkene owu na okulonga nayo sha ikwatelela konkalo yawo. 

Omukuluntusikola okwa gwedha po wo kutya osikola natango oya taalela omashongo, oshoka aanona oyendji aayelele moshikandjohogololo shawo ohaya tumwa kosikola hoka, omolwomuhandjo ngoka gu li ko, ashike onkalo kayi li nawa. 

“Oshoka aanona yamwe aashona unene, itaya vulu okweenda iinano iile, ohaya lala kombete yimwe oshoka inadhi gwana. Niikulya osho wo iizalomwa nayo uupyakandhi,” ta popi ngaaka. 

Omuyelele gumwe ngoka a li naye a yi moonkundathana nomutoolinkundana nguka Tusnelde Hafeni gwomimvo 21 gomOkongo okwa ti okwa ndopa ondondo 10, ihe okuza mpoka okwa kuutumba naakuluntu ye megumbo. 

“Onda hala okutameka ongeshefa opo ndi yambidhidhe aakwanezimo yandje, ihe kape na oshimaliwa shokutameka ongeshefa,” ta popi ngaaka 

Hafeni sho a pulwa ngele okuuva ngaa ngele oku na ooprogalama dhepangelo tadhi yambidhidha aanyasha okwa ti ke shi shoka tashi popiwa. 

Ta ti ooprogalama ndhoka itaye dhi uvu oshoka yo oya talika ka ko ongaantu yowala. 

-vkaapanda@nepc.com.na