Auleria Wakudumo
Mobile Telecommunications Company MTC okupitila moprogramma yavo hai ufanwa MTC 4Life, oprogramma yokukwafa oshiwana ota ka yandja omhito kOvanamibia 40 vehe na oilonga opo va kufe ombinga momadeulo oilonga yokomake oivike ivali oshali.
Avanelao ava tava ka hoololwa otava pewa omadeulo moilonga yokomake ngaashi okukulula, okutunga nokufoloma eedopi,
Okunduluka eeskopa naikwao, okupanda, okulonga nomalusheno, okuxwikila, okufaneka, nosho tuu.
Omupopiliko wa-MTC Erasmus Nekundi okwa holola ta ti omadeulo moilonga aishe ya tumbulwa otaa ka yandjwa kovanhu ve na owino yopombada moilonga ei.
“Konima yelihongo nedeulo lavo, otava ka mona oilongifo yokutameka eengesha davo osho yo oshimaliwa shi fike poN$5 000,” Nekundi ta ti.
Nekundi okwa weda po ta ti neudo, omaindilo okwa teelelwa okudja koshitukulwa shErongo, Hardap, Omaheke noZambezi.
Oprogramma otai ka yandja vati omhito kOvanamibia okudja koitukulwa aishe yoshilongo, va kufe ombinga notai ka kufa koitukulwa noitukulwa.
“Odula ya dja ko, oprogramma oya li mOmusati, Kavango East, Kavango West, Kunene, nOtjozondjupa. Ngaashi shi li omukalondjiikilile, neudo ohatu kufa ava vehe na oilonga okudja koitukulwa oyo inai pewa ekwafo la tya ngaho omudo wa ya,” Nekundi ta ti.
Nekundi okwa ti oprogramma MTC 4life oyimwe yomeeprogramma da nuninwa okuyandja omakwafo koshiwana okupitila mokuyandja omadeulo nehongo kuxwepopaleke eengeshefa dishona naadi dopokati.
Okwa holola ta ti oprogramma oya nuninwa okukandula po nokuxwepopaleka okuhe na oilonga moshilongo mokukwafela ovanyasha opo ve lilongele kuvo vene.
Omaindilo oukukufa ombinga moshinima omu otaa xulu mo27 Febuluali 2025.