Auleria Wakudumo
Omupopiliko wopolifi moshitukulwa shaShana, Chief Inspector Thomas Aiyambo okwa kunghilila ovakwashiwana va kwashilipaleke kutya otava londo moutaksi ve na oumbapila vomafendelo otuwa vatatu kekende, noya shangwa momunghulo ouyelele wamwene manga inava londa. Eshi Aiyambo okwe shi holola konima eshi omukadona weedula 26 omukalimo womOnawa hanga a fadukwa po naye keembudi motaksi yeembudi.
Otaku hokololwa kakadona a lefa otaksi okudja kolukanda Onawa nokwa li a hala okutulwa pOneshila mOshakati. Eshi a ya motaksi, vati okwa hanga mo ovalumenhu vane, vavali konima naumwe e li nomushingi komesho.
“Omushingi okwa shinga a uka kOshoopala ponhele aye kOneshila oko kwa uka kakadona,” Aiyambo ta ti. Eshi vati va fika ponhopa yopEhenye, kakadona okwa pula omushingi a mbilike ohauto opo a dje mo ashike vati okwa twikila ashike okushinga.
“Okwa kendabala okuyuulula omuvelo ashike okwa li wa hakwa. Ovafekelwa ova tameka okunyeka kakadona oinima yaye nokumupula a yandje keshe eshi e na,” Aiyambo ta ti.
Aiyambo okwa weda po ta ti ovafekelwa ova kufila kakadona ombele ndele tave mu kufa ongodi, eefaila li na eembapila daye noN$230 a li e na.
Konima vati ova umba mo nakuningwa oshihakanwa motuwa. Okakadona oka shikula otuwa taka tondoka nokukuwa.
Otaksi eshi ya fika pofikola pEhenye Primary, oya dama monhata ya li po.
Nonande ovalumenhu va li konima va faduka po, ovakwashiwana ve ya okukwafela okaadona ova pondola okukwata omushingi naao a li komesho naye nokwiifana opolifi.
Opolifi oya tula moipandeko ovalumenhu veedula 27 no37 aveshe ovakalimo vomOnawa.
Oinima ya kufwa nakuningwa oshihakanwa aishe oyaya naava va faduka po.
“Ohandi pandula ovakwashiwana eshi va longela kumwe okukwata eengangala edi. Ohandi indile yo va kale ve li oupafi nokudidilika eetaksi doipupulu. Nava kale ve shi eyooloko pokati keetaksi doshili naado di li kopate okulonga oimbuluma,” Aiyambo ta ti.