KATIMA MULILO – Muuna walilimo zemashumi amalalu kazesilezi ili mupokola yabelekela kwa khuta ya muatuli yomunyinyani mwa Katima Mulilo, Eric Simataa, nalumelezwi kulifa masheleñi akulibelela muzeko wahae kwande, hane abonahalile Labubeli mwa khuta yenyinyani ya Katima Mulilo Labune, fapila muatuli yomunyinyani Laina Nambonga. 

Simataa utalimana ni milatu yemibeli, buputeleli ni kusebelisa ofesi yahae kabulyangelino kuli akone kufumana sesiñwi. Taba ne isizwe la 16 Lungu 2026 kulumelela ya nyaziwa kuli akone kufumana muyemeli wamulao. Kulukululwa kwahae kuzamaelela ni litaelo zakuli haswaneli kuikopanya ni mubilaeli hamoho cwalo ni ndatahe. 

Mafosisa anyazwa kaona akulubelwa kuli na ezahezi mwahlaa 9 Ñulule 2025, ni 10 Yowa 2026, kanako yene sika patalazwa mwa Katima Mulilo, mwasikiliti sa Zambezi. Piho ya mapokola ibulela kuli Simataa nasunda ni kusabisa mubilaeli kuli amulife masheleñi kusicwalo mwanahae, Masule Sitali uka “bolela mwatolongo.” 

Simataa ubihiwa kuli nabata kuli alifiwe N$5 000 kuli Sitali ni mulikana’ hae balukululwe, ili baba kulubelwa kuli nebakile bamunata bakeñisa bunyemi, kasamulaho akulika mone bakonela kaufela kumukwalulela muzeko wakuli yena nakile aba nata pili. Bupaki bobuli fapila khuta bubulela kuli Simataa nalifilwe N$2 000 mi azwelapili kulaela kuli alifiwe masheleñi amañata. 

Sitali ni mulikana’ hae nebakile balukululwa kasamulaho akulumelelwa kulifa N$5 00 muñwi ni muñwi. Kasamulaho akuzwelapili kusundiwa kuli balife masheleñi, Sitali kihaya kwa mapokola. Mulelo wakukwacisa Simataa wakala kuongaongiwa, kuli mane Simataa ayo tamiwa amano amuhela masheleñi alikana N$1 000, kutisa kuli masheleñi ane alifilwe atahe fa N$3 000.