KUNENE – Ngoloneya woshitukulwa shaKunene Vipuakuje Muharukua okwa ti ombelewa yaye oye lilongekida efimbo keshe oku ka yambidida oshiwana sha dengwa kefundja nosho yo okuandjaneka omayakulo opashiwana.
Edi okwe di popya Olomakaya pefimbo a talele po omikunda odo di na omaumbo nomapya e li koshi yomeva.
Ouministeli wetanga leameno owa tuma edakadaka koshitukulwa shaKunene omo kwa li ngoloneya noveleli va yooloka vomoshitukulwa va ya keenhele da yooloka nelalakano lokutala onghalo yomeva efudja.
Okudja omwedi wa dja ko okwa lopotwa efundja la fika moNamibia koitukulwa ngaashi Kunene, Oshana, Ohangwena nOmusati.
Eefikola dimwe oda pata omanga ovanhu vamwe ova tembulilwa keenhele odo dihe na omeva.
Muharukua okwa ti moshitukulwa shaye omu na omikunda dihapu di li koshi yomeva neendjila da patwa.
Okwa weda po ta ti omaumbo 38 modoolopa yaPuwo oku li koshi yomeva.
“Ovanhu momaumbo ihava di mo vali molwashi ova tila okufya omeva. Ovanhu vamwe otava dengwa kondjala shaashi kave na oikulya momaumbo, ta ti.
Okwa yelifa ta ti omalongekido okwa pwa okuningwa opo ovanhu va ninga oihakanwa yefundja va twalelwe oikulya nomatalashe.
“Onghela otwa tuma edakataka lau umbata oukutu voufila opo li twalele oshiwana molwashi ina ndi hala okuuda omunhu a fya kondjala,” ta ti.
Okwa ti okwa komanda ovanhu tava longele kombelewa yaye nookansela opo va longe nondjungu okuyandjaneka omayakulo koshiwana.
“Omuleli keshe oku na okulonga nelitulemo ngaashi naana Omupresidente e tupa oshinakuwanifa tu ninge ovaleli koitukulwa,” ta ti.
Muharukua ou opo ashike a ningwa ngoloneya omwedi wa djako, okwa ti oshitukulwa shaKunene oshi li momake awa molwashi ota ka longa nelitulemo okuetela ovanhu omayakulo popepi.