Andreas Thomas
Mueteleli wanaha Nangolo Mbumba nanyatezi Mulao wa Manyalo kasamulaho akunyatisisa mulao ni kunyatela kuli uyelela ni mutomopuso wanaha. Sibuabui wamueteleli wanaha Alfredo Hengari, natalusize mabaka ane atisize kuli Mueteleli Mbumba anyatele mulao, one utisize maikuto ashelana asicaba.
Mueteleli wanaha nanyatezi Mulao wamanyalo kwamafelo añohola, ili kuyundisa Mulao wa Manyalo wasilimo sa 1961, niku kwala sikwalo kwamaikuto akuli muuna ni muuna kapa musali ni musali bakona kunyalana, kungelela ni manyalo anyatezwi mwalinaha zeñwi.
Mueteleli wanaha nabalile mulao, ni kutalima litaba zebalwa kaswalisano ni muyemeli wakatengo ka makwambuyu, ni kutalima kana no yelela ni mutomopuso wanaha. Neli kamukwa ocwalo Mueteleli Nangolo Mbumba nanyatezi Mulao wa Manyalo kakuli nopasize liswanelo za mutomopuso,” naekelize.
Hane afitisa mulao, muyemeli wakatengo ka makwambuyu Albert Kawana naize butokwa bwa mulao neli kukonkiseza ni kutoloka kuli manyalo kiñi. “Mulao uyelela ni lika zeli za butokwa mwanaha Namibia, mikwa ni sizo sa naha Namibia hala kuli sesipaka linyalo ki sifi, ili muuna ni musali. Zeo ki zabutokwa mwa kueza milao,” nabulezi.
Nazwezi pili kutalusa kuli naha ni naha ina ni litaba za kale, zeo banga kuba zabutokwa, mikwa ni lizo, ili ze bupa musumo wa milelo ya sicaba. “Mueteleli Nangolo Mbumba hana nyatezi mulao kusupeza seo naha Namibia ili sona, mi hape kitaba yakubuluka litumelo zeo,” nazwezi pili kubulela. Kuhatiswa kwa mulao kutaha sicaba hane si kangisana hala manyalo amuuna ni muuna kapa musali ni musali.
Ba ba sikai ba sicaba banga hatiso ya mulao kuba muhato mwa mulaho hala kulwanela litukelo za sicaba sa LGBTQI+ mwa naha, se si lwanela kuli silemuhiwe ki mulao. Kono Hengari naize naha Namibia isiala kuba naha ya buiketo. “Naha hape ikumalezi kukuteka liswanelo za ba LGBTQI+ ha ba zekisiwi. Kikalulo ya luna, lubatu ba hamoho.
Mueteleli wakopano ya PDM McHenry Venaani uamuhezi Mulao wa Manyalo omunca, mi naize uyelela ni seo kopano yahae iyemela “Mulao wa Manyalo uyemela maikuto abuñata bwa sicaba sa naha Namibia, kakulemuha linyalo kuba mwahala muuna ni musali. Kacwalo, mulao uyelela ni tumelo ya kopano ya PDM kuli halu amuheli manyalo amuuna ni muuna,” nabulezi.
Venaani nahatelezi kuli mulao ulukile mwa nzila yeo, nihaike ikana yaba kuli kuna ni ze kona kutatubwa hala puzo ya mutomopuso. “Hane lu ambola fataba yeo ne ni file mamela kwa limembala za ndu ya mulao kuli ni halulumelelana kaufela, luswanela kueza mulao osa puyi, oka kona kuyema nako yetelele,” nabulezi.
Mubuleli Lukas Katenda wa keleke ya Reformed Evangelical Anglican mwa Namibia (Reach-Na) na amuhezi mulao, mi naize uyelela ni litumelo za silumeli. “Linyalo katoloko, li mwahala muuna ni musali, mi kwa neku la silumeli, batu neba ngile muleo ni kubabaza. Ha ukoni kubiza tamahano mwahala muuna ni muuna kapa musali ni musali kuli ki linyalo. Kamulao, kasizo ni ka sicaba ha ki linyalo mwakona kuifa libizo lisili,” nabulezi.
-Nampa
– Kekezo kwa piho Lahja Nashuuta.