ONGWEDIVA – Omunambelewa konooli wehangano lokuyandja ohonde lo-NAMBTS Adolf Mwafangeyo okwa ti ehangano lavo ola taalela eshongo linene lovanhu tava pula okufutwa ngeenge tava ka yandja ohonde. Okwa ti naashi osha eta opo ovanhu va momwaalu mushona okuyadja ohonde. 

Mwafangeyo okwa hokolola ta ti, Desemba a dja ko ehangano lavo kakwa li tali dulu okuyandja ohonde kovanaudu molwaashi kapa li ohonde meemhungulilo dalo. 

“Onghalo yokuhe na eudeko kombinga yefimano lohonde nayo otai etifa ovanhu va kale vehe na ohokwe yoku ka yandja ohonde,” ta ti. Mwafangeyo okwa ti mopaife ove lipyakidila okuya keefikola nelalakano lokuxwaxwameka ovanafikola va ka yandje ohonde. 

Okwa yelifa ta ti unene tuu komandiki okuyandjela ohonde oo e li konooli okwa didilikwa ku na omivalu dovanhu dishona tava ka yandja ohonde. 

Okwa kumaida ovanhu opo va xulife po okuxwaxwameka vakwao va pule okufutwa ngeenge tava ka yandja ohonde. 

“Otu na ovanaudu vahapu moipangelo ve li momhumbwe yohonde ashike kape na ohonde yokuyandja,” ta ti. Okwa kumaida oshiwana opo shi holoke momwaalu muhapu oku ka yandja ohonde molwaashi ohonde oya fimana kovanaudu. 

Okwa ti NAMBTS ota twikile okukwashipaleka kutya ovanhu ve li momhumbwe yohonde moipangelo ova pewa ohonde opo eemwenyo davo di xupifwe. Okwa ti ohonde ei tai yandjwa koshiwana ohai kwafele ovanhu ve na omikifi da yooloka ngaashi okanghela, pefimbo oomeme tava pulumuna, omunhu ngeenge ta tandwa nosho tuu omikifi dikwao. 

“Osha fimana ngeenge hatu xupifa eemwenyo dovanhu moipangelo tashi pitile mokuyandja ohonde molwaashi ovanaudu vamwe ohava kala ve li monghalo idjuu tai pula ohonde,” ta ti. 

Okwa twa oshiwana omukumo opo shi topolelafane ouyelele kombinga yefimano lohonde opo ovanhu va kale ve na eudeko la wana nokukala ve na ohokwe yokuyandja ohonde. 

Okwa ti endiki lavo olo li li moshipangelo shaShakati nohali longo Omaandaxa keshe okudja 10h00 fiyo 18h00 oshivike keshe. 

“Ovanafikola ve li koiputudilo yopombada ovo unene va didilikwa hava holoka momwaalu muhapu okuyandja ohonde,” ta ti. Mwafangeyo okwa ti ehangano lo-NAMBTS otali pandula oshiwana eshi shi na ohokwe yokuyandja ohonde komandiki a yooloka ayeshe moshilongo. 

-fhamalwa@nepc.com.na