Adolf Kaure  

ǂHanusise a mîǁ-guisa ǁîs a ǀoro !khō!oamaris, ǁgâusîsenaon !aromas ge, 1 !Khanni disa xu go sîsentsoatsoa tsî nēsi N$15 ǀgui iri ai go sī. Nēs ge N$3 di ǀaros, ǂguro gere mātarehe N$12 ǀgui iri dis ai go ǀarohe. Nē ǀgapiǀgapis ge ǂhanub di dītsâdi, ǀoro !khō!oas ǁgâusîsenaon !âb !nâsa oe-ams ai hâ, ǂgurosen ge sîsenmā-aon di ǀuniga mî-ǁguib, nēsin ga tare-i ǀgui-e a !khō!oas !naka hâ is khao!gâ. Nē !khō!oamaris ge ǁnāti a ǀaweǁguisa, 1 !Khanni 2027 dis ais N$18 ǀgui iri ai nî sīs kōse. ǂHanub ge, Ministeris Sîsengu, ǂHarugun !Gaeǁaredi tsî Sîsenga ǂNuwis dis !nâ-ū ǁkhāti ǁnā sîsenaon !hū-omkhâis tsî !ûi-aon (security) !âkha din tsîn di ǁîs a ǀoro !khō!oamarisa ge kō!gâ. Aitsama ǂharuguba ra dī tsî ǀAeǁgams di ǁAegub ǂharugu!âb !nâ ra ǁamaxū Adeline Kukuves ge nē !khō!oamaris di ǀgapiǀgapihes xas ge ǂnauǂuiǂai!nâhe ti gere mî. ǁîs ge !ûi-aoe !nona kurixa ǀgôa-e !ûibahes !aroma gere ǂâi!nâǁgui, xawes !khō!oamaris, ǁnā khoe-e mātares disa sī!nâ tide, ǁîs di hōǂgās tsîn ǀgaisa tama xui-ao. “Sîsenosib !gôab ge Namibiab !nâ a ǀgapi. Sida hōǂgādi tsîn kara ǂam o, o mâti da ǁnā ǂgaoǀkhāsa !khō!oamarisa nauna nî mātare ǁkhā? Nēpa, Namibiab !nâ da ge !gomma ra tsâ,” tis ge tsâsiba gere ǁgâiǂui. Namibiab !Gôakhâidi ǂNûiǂgās, 2023ǁî kurib di Omdi tsî ǁAngāsaben !Gôakhâib !nâb ge Namibiab sîsenosib !gôaba 36.9% ai ge mâ. Nēs ge kai ǂâiǂhansensa ge mâi tsî ǂauna ǁanǂgāsabena aitsama ǂkhari ǂharuguga tsoatsoabasens !oa ge ǁ-gari, tsēsa xu tsēs ǁga ûi!kharusa ǁawo-awobasens ase. Nēs xa !aromahe hâse di ge ǂauna ǁgûde ǂkhari ǀgôaron âde ǁgâudi ai !ûi!gâs ose ǁnāxū tsî ûiba ra ôa, !ûi-ao-e mātares ǁkhāsib a ǀkhai amaga. ǀNî aitsama ǂharugu-aos, Julia Thomas ge nē ǀgapiǀgapisa maris ǁgâusîsenaon disa ǁkhoreǁhare tsî gere mî, xūn di ǂganǀgaugu tsî ûib ra !gom os nē ǀgapiǀgapisa, ǁgâusîsenaon tsîna ǁnā ǁkhāsib !nâ ra mâi in ǁîn tsîna ûibasen ǁkhā. !Hū-omkhâis !âb di sîsenaon ge 1 !Khanni 2026 disa xu N$14 ǀgui iri ai nî mātarehe tsî 1 !Khanni 2027 !nâ N$18 ǀgui iri ai nî sī. ǁNāpab !ûi-aon !âb sîsenaona ge 1 !Khanni 2026 disa xu N$16 ǀgui iri ai nî mātarehe tsî 1 !Khanni 2027 !nâ N$18 ǀgui iri ai nî mâ hîa.