Auleria Wakudumo
Opolifi moshitukulwa shaShana otai indile moshiwana ouyelele shinasha nefyo lohanana oyo ye lituwa olutu la ninga nai eshi ya laimwa komulungu nokomayulu mondoloma yoimbodi.
Oshiningwanima osha ningilwa popepi noJunior Self Catering Apartment mOngwediva, sha ningwa Osoondaxa lwopo 13h33.
Edi oda kolekwa komupopiliko wopolifi moshitukulwa shaShana Chief Inspector Thomas Aiyambo.
Otaku hokololwa ohanana ye lituwa kovahongwa vopofikola yaGabriel Taapopi ovo va li tava tale vati momandoloma.
“Omanga ovanafikola tava tale mendoloma, omusamane umwe a li e va tala eshi tava hade okwa uda tava popi olutu lokaana vati li li mondoloma omo,” Aiyambo ta ti.
Omusamane vati okwa enghena popepi nokupula ovahongwa kutya otava popi shike.
Ovahongwa vati ova ulikila omusamane olutu lohanana nokwa dengela opolifi meendelelo.
Opolifi oya hanga ohanana ya ekelwa mendoloma inai djala sha, ya laimwa komulungu nokomayulu.
Olutu lohanana vati ola hangika la ninga nai osho tashi holola kutya hapo ya ekelwa mo.
Opolifi otai indile keshe ou e na ouyelele a kwatafane nopolifi keshe popepi naye.
“Ohatu indile ovakwashiwana va kwatafane nopolifi nomola yongodi tai shikula, 0811228421 opo tu dule okutula nakudipaa ohanana ei moipandeko,” Aiyambo ta ti.