WINDHOEK Ehangano lyokugandja nokuwapaleka omeya moshilongo, NamWater pethimbo ndika otali gandja omeya pamalweetho miitopolwa muumbangalantu woshilongo, shika osha etwa kompumbwe yomeya moshitopolwa shika. Momushangwahokololo kiikundaneki omathimbo ga zi ko, Omukuluntu gOmakwatathano moNamWater, Johannes Shigwedha, ota ti egandjo lyomeya pamalweetho olya etithwa komaupyakadhi ngoka ga taalela egandjo lyomeya okuza pOshidhinditho shOmeya oshinene mOshakati. “Shika osha etithwa kOndaama yetu yOmeya ngoka inaga dhindwa ndjoka ya nika enono noitayi vulu we okukala nomeya ogendji gokudhindwa,” Shigwedha ta ti. Ta gwedha po kutya ompungulilo yehangano ndika ndjoka onene-nene oya udha ngashingeyi yi li pondondo noopelesenda ashike 28, shoka sha etitha omeya omashona lela ngoka inaga dhindwa mOndaama. Oku shi talela monkalo ndjika, kape na omeya ga gwana ngoka ge na okudhindwa nokugandjwa koondoolopa dhayooloka moNooli. Oondoolopa dhika odha kwatela mo Oshakati, Ondangwa, Ongwediva, Omuthiya, Omafo, Ohangwena, Eenhana, Ongha, Onayena, Okatope oshowo omahala galwe haga mono omeya okuza momahala ngoka. Onkee, okuza mOmaandaha oshiwike shika, oshigwana moNooli osha tseyithilwa shi pashukile egandjo lyomeya pamalweetho pootundi dhontumba mesiku. Omeya otaga ningi haga gandjwa pamalweetho okuza pokati kotundi ontimugoyi yokongulohi sigo ohamano yokeengulasha uule woshiwike ashihe, sigo pwa gandjwa ishewe etseyitho lilwe. Nonando inapu gandjwa omauyelele gothaathaa kutya omukundu nguka otagu ka kandulwa po uunake, NamWater pethimbo ndika oku na ashike ondaama yimwe yomeya ngoka inaga dhindwa oyo tayi longo, pehala lyoondaama mbali dhoshito. Pethimbo ndika, elalakano enene okushilipaleka kutya aakalimo moondoolopa dhoka dha gumwa kompumbwe yomeya oya mona omeya nonande oga ngambekwa. Pokati mpoka, ethano alihe lyoondondo dhomeya moondaama moshilongo ashihe otali monika lya dhimeya mokutala komayalulo gokoshiwike. Pashiholelwa, moDaan Viljoen mOvenduka oshiwike shika ondondo yomeya oya thikama poopelesenda 2.2, omanga ondondo ndjika omvula ya zi ko ya li poopelesenda 97.2. Moshitopolwa shaGobabis, Otjivero Main Dam ngashingeyi oyi na oopelesenda 61.1 dhomeya omanga omvula ya zi ko pethimbo lya faathana ya li noopelesenda 76.1. Onkalo ya faathana yompumbwe yomeya otayi monika wo mOndama Omatako ndjoka yi na oopelesenda 58.1 pakuyeleka noopelesenda 96.6 omvula ya za ko. Okuya muumbugantu woshilongo, oondama adhihe ntano odhi li poopelesenda 50.6 pakuyeleka nondondo yomeya yomvula ya zi ko ndjoka kwa li ya thikama poopelesenda 78.8 pethimbo lya faathana.