Hilma Nakanduungile

EENHANA – Omupevipresidente Netumbo Nandi-Ndaitwah okwa gandja omakumbatha 100 gongushu yoN$34 000 kaayelele mboka ye li mompumbwe moshitopolwa shaHangwena.

Omakwatho ngaka oge ya konima sho ombelewa yangoloneya gwaHangwena ya tseyithilwa onkalo moka tamu menywa yamwepo yomaayelele moshitopolwa, mboka taku hokololwa kutya otaya si uutalala, unene tuu aakulupe, aanona naanuulema.

Omakumbatha ge li 18 oga pewa aayelele yokOuhalamo, 32 oga pewa aayelele yokOmbili mEenhana, no-50 oga pewa aayelele yomoshitopolwahogololo shaKongo.

Pethimbo ta gandja omakwatho pehala lyomupevipresidente, ngoloneya gwaHangwena Sebastian Ndeitunga okwa yelitha kutya ombelewa ye oya thikithilwa etumwalaka okuza kaakalelipo yaayelele kutya ope na yamwe ye li mompumbwe noonkondo, ngele tashi ya komakumbatha gokwiisikila.

“Konima omupevipresidente sho a kundana oshinima shika, okwa tokola okugandja ekwatho. Otwa tala unene kaakulupe, uunona naanuulema mboka ye li mompumbwe,” Ndeitunga ta yelitha.

Ta indile mboka ya pewa omakumbatha ye ga kwate nawa noku ya kunkilila wo yaa ga landithe po. 

“Okwa konekiwa yamwepo yomune taya landitha po omakwatho uuna tamu ga pewa, nosho wo yamwe yomaanyanyamagulu taya yaka po omakumbatha nosho wo iikulya yaakulupe uuna ya hawala noku ke yi landitha po. Alikana iinima ayihe mbika kayi li mondjila, onkene nayi mone ehulilo,” Ndeitunga ta ti ngaaka. Ndeitunga ta tsu omukumo oshigwana shi inekele epangelo nosho wo aaleli yalyo. 

“Uuna mu na uudhigu, tu tseyithileni okupitila maaleli yeni ngaashi ookansela, tse tu tale kutya uudhigu otatu wu kandula po ngiini,” Ndeitunga ta ti ngaaka.

Peneyambeko Kashidulika ngoka e li omukalelipo gwaayelele mOmbili mEenhana okwa holola olupandu lwe molwomakwatho ga gandjwa komupevipresidente. 

“Otwe mu pandula noonkondo sho mwa etela oshigwana shika shaadhinwa omakumbatha. Oyendji yomuyo otaya mono iihuna. Yamwe ohaya lala ashike pevi inaapu yalwa sha, onkene otwa pandula komakwatho ngaka. 

Ta gwedha ko ta ti, nonando aayelele ohaya mono omakwatho ga yooloka, yamwepo yomaagundjuka yaayelele otaya hepeke omakwatho ngoka taya pewa kepangelo, molwashoka oya kwatwa ko unene kombepo yokulanditha. 

“Yamwepo yomaakwashigwana ohaya ningi uuna aayelele ya pewa omakwatho gontumba kepangelo, ohaya heke aagundjuka yaayelele opo ye ya faalele omakwatho ngoka, pauvaneko lyomwaalu gwoshimaliwa shontumba, nenge tashi vulika otombo,” Kashidulika ta ti ngaaka.