Omupevi prima minista Netumbo Nandi-Ndaitwah okwa ti ngele aaleli yeli koshipundi itaya hula ko oongaku nokuhila iikayisino, ondjokonona otayi ya pilukilepo, uuna inaaya gwanitha shoka ya uvaneko mo2030.
‘’Okuna ashike omimvo hetatu, onkene otuna okulonga twa manamo opo tu gwanithe po shoka twa uvaneka mo2030. Shika ota tu shi ningi ashike uuna ta tu longele kumwe,’’ ta popi ngaaka.
Nandi-Ndaitwah okwa li a popi ngaaka esiku kwali taku ndhimbulukiwa esiku lyomapendafula lya pita nale, moshitopolwa shaHangwena momukunda Iilyateko. Aaantu yapita 400, yaza kiitopolwa ya yooloka yoshilonga okwa li ya ndhimbulukile esiku ndyoka pamwe naNdaitwah. ‘’Esiku ndika olyomapendafule, onkene olya simana aluhe okundhimbulukiwa oshowo okuuva ondjokonona nkene oshilongo shetu sha kolonyekwa na nkene sha manguluka,’’ ta fatulula ngaaka. Ta kumagidha oshigwana kutya, inashi pukithwa, epangelo lyaNamibia konima ye manguluka olyalonga.
‘’Aanona yetu nena otaya ende oondjila oohupi okukamona elongo, oondjila ndhokuushayi ondhindji odhina oopate ndhooteya, shoka kaashali po ethimbo lyuukoloni,’’ ta popi ngaaka. Ta gwedhapo ta ti, nonando oyena natango uupyakandhi wulwe wa pumbwa okukandulwapo, epangelo olya longa. Nandi-Ndaitwah ta kumagidha aanangeshefa yaanyasha ya longo yiitulamo oshoko oyo yena okukokeka eliko lyoshilongo shika oshowo okuhulithapo ondjala moshilongo. ‘’Shoka tandi indile moshigwana okulonga twiitulamo oshowo okulongela kumwe, opo uupyakandhi tuli muwo wu mone ehuulilo oshowo tu longekindhe onakuyiwa yili nawa,’’ ta ti ngaaka. Lucia Witbooi ngoka ali naye poshituthi ndhimbuluko mpoka, ngoka naye e li methigathano lyokuulikwa onga omupevi sekeletali general okwa ti, okuna omukumo kutya ota sindana. ‘’Aluhe omuntu ohayi methigathano nelalakano lyokusindana ihe kali shi lyokundopa,” ta ti ngaaka. Ta gwedha po kutya ka pwali pwa pumbwa omahogololo opo Nandi-Ndaitwah atothwemo oshoka endhina lye olya kala nale lyi li momandhinga ngoka ga kala po. ‘’Onduuvite nawa sho ongundu yeya po nomulandu nguka, kutya aaulikwa naya talelepo iitopolwa ayihe moshilongo opo ya vule okwiiyulika koshigwana oshowo okuyamukula uuna pena omapulo,” ta ti ngaaka.
Witbooi ta ti, okuza esiku ndyoka otaya kala taya ende pamwe taya iyulike, sigo oshiwike sha hugunina omanga omutumba gwiikalekelwa inagu tameka.
– vkaapanda@nepc.com.na