Presidente Netumbo Nandi-Ndaitwah ntani All People’s Party (APP) kavageve sikonda opo vana kulizuvha asi awo tavakaruganena kumwe mokutwara ekonomi lyosirongo komeho, awo kavatente asi takaruganena kumwe mokukatura NDP6 mosirugana nokuyitara asi vaNamibia vahepa kusikisamo sitambo esi so Nzodi zetu zo 2030.
Ogu kahuyungire posiruwo nye sosigongi kumwe naPresidente nonompitisili daAPP kembo lyepangero moune unapuko, presidente katente asi age kuna kusikisamo situmburwa sendi gahuyungire mondango zanavenye apa gahuyungisire muhoko omu gatente asi age ngamona nompitisili donombungapoliyika dokulisigasiga edi dakara noyipundi yado mondango zanavenye.
Age kayinkondopekere asi epangero lyelike kapi talikara asi liruganene pwalyelike nye lyahepa kuruganena kumwe nombongarero zanavenye omu navatara asi noprojeka dize mosirugana. ‘’ Ediveta lyetu kwatupa yitumbukira yokulisiga siga, nye twahepa kuruganena kumwe. Nzodi zetu zo 2030, kwazitambura natuvnye, makura yiyonye yina kara asi kwato ogu ngava siga konyima. Egendeso lyountantatu vahepa ngesi kugava elimbururo kwankenye eyi vatumbwidira monzodi zetu zo 2030,’’ yimo ana kutanta.
Age katente asi NDP 6, kuna kara nye nzira zetu ezi zina kututwara nye ko 2030 kehagero ntani nokuhundira nye nombunga politika diture yosirongo pelikwamo kugusako upolitika. Presidente gwaAPP, Ambrosius Kumbwa katambwireko sigongi sangesi omu katente asi kuna kulikida asi tuna kuru paupolitika moNamibia noudemokoli wetu.
Age katente asi APP kuruganesa nokusikisamo sitambo sepangero, kugusako eyi twalisiga paupolitika morwa natuvenye sitambo simwe tupu kukulika sirongo setu. ‘’ Nsene otara nomanifesto detu nadinye, ose kwakara noyininke yoyinzi eyi atutumbura yokulifana. Eyi nayinye kuna kara asi simwe tuna kutara sekuliko lyosirongo nanayinye nye ngoso yimo ana kutanta Kumbwa.
Age kapandwire Presidente naNkuru ministera eyi vana kudingura nomukunda nadinye moNamibia vazuvhe asi vantu vetu ngapi vana kuparuka, eyi kuna kumoneka asi kuna hara vawapukurure maparu govantu kapisi kuhuyunga tupu.
Kumbwa katente asi APP, kuna mugumu unene yokuhamena nondima ntani malizuvho aga vaturapo pokatji kaZimbabwe, Mashonaland west omu nye vana kuwapukurura sikandero ntani vakare negano lyokulipa magano. Elizuvho vatura pokatji kaKavango zoupumezuva naMashonaland zoutokero. Nye age simpe katente asi yina kukwamako kuyitura nye mosirugana. Eyi yina kara mulyo kutura nye magano nagenye mosirugana. Kumbwa katente asi nombunga politika kapisi kuhageka sirugana sazo konyima tupu zomahoroworo.
Nsene yigongi yokukondjera yipundi vana mana makura kulizengura, ose kuhingira mevango limwe tupu, eli lina kupangera. Maliyongo ngangesi mulyo unene kuna kara nye etateko morwa epangero pokurugana lyelike kapi tayiwapa.
Nompitisili nadinye kavaligwasanene asi vahepa kuruganena kumwe, kapisi nkenye ogu pwendi, eyi yiyo ngayilikida asi Namibia kuna kusikisamo NDP 6 ntani ngatusikako ko Nzodi zetu zo 2030 nosiruwo.