Auleria Wakudumo 

Ehangano lovalihongi koiputudilo yopombada hali ifanwa Nanso moshitukulwa shaShana melongelokumwe nokakadona dingi komaulikilo oipindi aNgwediva 2025 Lisa Nekanda ova ndungika ovanafikola noshikonga shoukoshoki, oundjolowele wopamadiladilo nehongo. 

Oshikonga eshi osha yandja yo ekwafo loututa voukadona ve dule 100 pofikola Nengushe Secondary mOndangwa. 

Oshikonga shavo osha nhuninwa okulonga ovanafikola oukoshoki mokati kavo osho yo oku va twa omukumo opo va twikile okulihonga noudiinini. 

Nekanda okwa holola kutya oshikonga eshi osha yandja yo oututa voukadona ve dule po100. Nanso okwa yandja ekwafo eli opo va xwaxwameke ehongo lomafimbo nokukwashilipaleka kutya ovanafikola aveshe ova mona ehongo itali iwa moshipala komaimbo opaushitwe. 

“Otwa itavela kutya ehongo oufemba wokaana keshe na kape na okaana taka kala konima molweemhumbwe defiku keshe ngaashi oututa voukadona,” Nekanda ta holola. 

Oshikonga eshi osha ndungika yo nokutwa ovahongwa omukumo moipambele youndjolowele wouluvi, nghene ovahongwa ve na okufiila ouluvi wavo oshisho unene pefimbo eli ve li pokutaalela omakonaakono okomudo. 

Ovahongwa ova kumaidwa yo va fimaneke ovahongi novahongwa vakwao. 

Oshikonga eshi osha ndungika yo ovahongwa kombinga yefimano loufikepamwe mehongo opo ovanafikola ovamati noukadona aveshe va hange omalalakano avo shi fike pamwe. 

Oufikepamwe mehongo otau tu yo kumwe nomamalakano aNanso. Nanso oha kendabala okukandula po omainda aeshe oo a dingilila ehongo lovahongwa unene ovo ve li koiputudilo yopombada ya yooloka nokukwashilipaleka kutya ovalihongi aveshe ova mona omhito ya faafana mehongo opo va mane omalihongo avo. 

-wakudumoauleria@gmail.com