Vicroria Kaapanda
Ehangano lyi na sha netonatelo lyoondjila (RA) Road Authority, olya pata iitayi yalyo iyali, Okongo nokOutapi sho gumwe gwomaanambelewa a monika omukithi gwoCovid-19.
RA okwa pata iitayi ye iyali, miitopolwa Omusati nOhangwena Etiyali lyoshiwike shika nomasiku tayi ka patuluka otaga ka tseyithwa. Omukuluntu nomugandji gwomawuyelele nomakwatathano mehangano lyo-RA Hileni Fillemon okwa ti, oNaTis kOutapi oko ashike kwa monika omunambelewa gumwe e na omukithi ngoka, shoka sha patitha ombelewa opo yi tsininwe ayihe.
“Oshitayi shaKongo, inamu monika mo itamufekelwa nando ogumwe e na omukithi gwoCovid-19, ihe ombelewa ndjoka oya pata opo nayo yi tsininwe ayihe. Otatu ka tseyitha omasiku oombelewa ndhika mbali tadhi ka patuluka methimbo efupi,” Fillemon ta ti ngaaka.
Ta gwedha po ta ti, kehe ngoka ta ka pumbwa omakwatho, na thike poombelewa dhoNaTis miitopolwa yilwe.