Auleria Wakudumo 

Ehangano lokuandjaneka omawi momhepo nedina la shivika nawa oNamibia Broadcasting Corporation (NBC) ole likanyuna omapopyo a popiwa komunashipundi womutumba wopashiwana wongudu yoIndependent Patriots for Change (IPC) Louw Mouton kutya okwa dopa okufuta oshimaliwa shomafendelo koNamibia Revenue Agency (NamRa). 

Momutumba wopashiwana wa ningwa omafiku aa, Mouton okwa holola kutya vati NBC okwa dopa okufuta oifendela yaye koNamRa. Mouton okwa holola yo kutya ehangano lokuandjaneka omawi momhepo ola ya mo onyala moshiningwanima sheemiliona N$353 vati da dja kepangelo okukufa NBC koshi moshikumhungu eshi. 

Omukulunhuwiliki mehangano lo- NBC Stanley Similo okwa holola kutya omapopyo aeshe a ningwa kuMouton otaa lundile ehangano, kae na oushili notaa yandje ouyelele woipupulu ponhele yoshili. Similo okwa holola ouyelele womondjila kutya ova kala nokufuta oishoshela yavo kuNamRa. 

“Okudja muSeptemba neudo, NBC okwa fikama peemiliona N$3 odo di na okufutwa mo20 Kotoba 2025. Eshi otashi holola kutya NBC okwa kala nokufuta oishoshela yaye pefimbo na ke na eendjo di li konima,” Similo ta fatulula ngaho. 

Omukulunhuwiliki okwa weda po ta ti ehangano ola kala mekwatafano liwa naNamRa okudja mo2021. Ehangano ola futa eemiliona N$122 okudja moshikefa shavo vene. NBC okwa futa ko yo oishoshela yeemiliona N$76 odo ali a pewa kuNamRa. Similo okwa yelifa kutya eemiliona N$33 odo da li da kala inadi futwa oule wefimbo omanga epangelo inali tota po NamRa oda dimwa po kouministeli woimaliwa. 

Minista woshimaliwa pefimbo opo, Ipumbu Shiimi oye a li a yandja oshimaliwa shi fike pobiliona N$1,4 okudima po eendjo doiputudilo yepangelo ngaashi: NBC, Unam noTransNamib. 

NBC okwa holola eudonai laye momapopyo omunashipundi nomulineekelwa koshiwana. Okwa ti omapopyo vati elundilo ngaashi eli otali kufa po elineekelo olo oshiwana shaNamibia sha tula mehangano lokuandjaneka omawi momhepo. -wakudumoauleria@gmail.com